תלמידי וחסידי סאטמאר נעמען אויף מיט איבערראשונג אז כ"ק אדמו"ר מסאטמאר שליט"א וועט צום ערשטן מאל אונטערנעמען א געהויבענע מסע הקודש צו די מקומות הקדושים אין אייראפע, אינאיינעם מיט א קבוצה נכבדה נגידים ותומכים וואס שליסן זיך אן מיט פאנטאסטישע סכומים למען החזקת קהילות ומוסדות סאטמאר.
די מסע הקודש איז געווידמעט פאר די נדיבי לב, וואס געבן אצינד א האלבע מיליאן דאללער צו פינאנצירן דעם מאסיוון פראיעקט מיט די נייע בית המדרש הגדול והחדש דקהל יטב לב ד'סאטמאר אין קרית יואל, וואס בליהט און שיינט בליעה"ר מיט יעדע פארבייגייענדע טאג, מיט פרישע איינריכטונגען לטובת די טויזענטער מתפללי בית המדרש וחברי הקהילה.
די געהויבענע מסע הקודש וועט פארקומען קומענדיגן חודש חשון הבעל"ט, אין די וואכן פון פרשת לך לך אדער וירא, צווישן עטליכע פרייליכע שמחות במעון הקודש פונעם רבי'ן שליט"א. אין שפיץ פון די געהויבענע נסיעה וועט דער רבי שליט"א פראווענען א היסטארישע שבת מיט די חשובע נדיבים על שולחן המלך, און קיין קלארע באשטעטיגונג וואו די שבת וועט פארקומען איז נאכנישט קלאר.
נעכטן מאנטאג אויפדערנאכט איז פארגעקומען די ערשטע מסיבה אין קרית יואל, וואו די ערשטע קבוצה נכבדי העדה נדיבי לב האבן אונטערגעשריבן שטרות מיטן רבי'ן צו מנדב זיין די פאנטאסטישע סומע פון א האלבע מיליאן דאללער, און דערמיט זיין א שותף לדבר מצוה צו קענען מיטהאלטן די היסטארישע מסע הקודש.
