אין שטאט לעיקוואד איז אין די לעצטע תקופה אונטערגענומען געווארן א פרישע פראיעקט דורך לאקאלע עסקנים, צוצושטעלן שפאגל נייע חתונה זאלן וואו צו פראווענען אידישע היימישע שמחות אויף א געשמאקע פארנעם, אבער עס זאל אנקומען גרינג און ביליג באגלייט מיט תקנות, וואס זאל דראסטיש שניידן די גרויסע חתונה הוצאות וואס הויערט אויף מחותנים בעת שמחתם.
צו דעם צוועק האט מען געלאזט אויפבויען צוויי נייע חתונה זאלן, עטרת בלומא און עטרת אסתר, וואו עס וועט געפראוועט ווערן היימישע חתונות פארן פרייז פון דרייצן טויזענט דאללער אלעס צוזאמען, אריינגערעכנט דאס עסן, די מוזיק, די בלומען, און אלעס ארום. נעכטן מאנטאג אויפדערנאכט איז אין א מזל'דיגע שעה געפראוועט געווארן די ערשטע חתונה אין די נייע עטרת אסתר זאל, וואו הונדערטער תושבי העיר האבן זיך מיטגעפריידט צו דעם פרייליכן מאמענט.
נאכן פראכטפול פארענדיגן די נייע זאלן, איז דעם זונטאג פארגעקומען די מעמד קביעת מזוזה ביי די נייע זאלן וואס געפונט זיך אויף אוק סטריט, מיט די באטייליגונג פון חשובע רבנים און עסקנים, אין שפיץ פון הגאון הגדול רבי מלכיאל קאטלער שליט"א ראש ישיבה בית מדרש גבוה ד'לעיקוואד. דערביי האט מען געהערט א באריכט פון די חשובע עסקנים, איבער נאך פינף און זיבעציג חתונות וואס זענען שוין באשטימט פארצוקומען אין די נייע זאל.
