שטייענדיג א וואך בעפאר די פיפטע יומא דהילולא קדישא פון כ"ק אדמו"ר מצאנז זצ"ל פון אמעריקע, וואס געפאלט די קומענדיגע וואך י"ב תמוז, נעמט כלל ישראל אויף די פרייליכע תורה'דיגע בשורה איבער די ערשיינונג לאור עולם פון די נייע הערליכע ספר "אוצר שיטה מקובצת חזון נפתלי", מדברי תורתו וחידושיו פונעם רבי'ן זצ"ל על הש"ס, די ערשטע באנד אויף מסכת גיטין.
דער רבי זצ"ל וועלכער איז געווען א גאון מופלג בתורה און מחדש געווען חידושים נפלאים, האט געשריבן פילע אוצרות חידושי תורה, און צוגעצייכענט הגהות והערות אויף פילע כתבי ראשונים ואחרונים. אצינד נאך לאנגע יארן האבן די קינדער האדמורי"ם מצאנז שליט"א ממשיכי דרכו בקודש צוזאמגעקליבן די פילצאליגע כתבים און חידושים, עס איבערגעארבעט אויף א געשמאקע פארנעם למען ירוץ בו הקורא, און צום היי יעריגן הילולא קדישא ערשיינט אין א מזל'דיגע שעה די ערשטע באנד פון חידושים אויף מסכת גיטין.
די נייע ספר אוצר שיטה מקובצת איז א הערליכע ליקוט פון ראשונים ואחרונים, מיט פילע געשמאקע הוספות צו פארגרינגערן דאס לערנען און נאכזוכן די מקורות בתורה, צוגעצייכנט לויט די סדר הדפים און די גענויע פלעצער ווי די חידושים זענען נוגע.
