שטייענדיג פופצן חדשים נאך די הסתלקות פון כ"ק אדמו"ר מסקולען זצ"ל בעל ישועת יעקב, זענען חסידי סקולען נתבשר געווארן מיט פרייד אז אין די טעג ערשיינט לאור עולם די ערשטע באנד פונעם ספר הק' ישועת יעקב, מבאר תורתו פונעם רבי'ן זכר צדיק לברכה, וועלכער האט אזויפיל משפיע געווען בחיים חיותו אויף קהל עדת צאן מרעיתו וכל בית ישראל.
אין די לעצטערע חדשים זענען די עוסקים במלאכת הקודש געווען שטארק אקטיוו אהערצושטעלן א פרעכטיגע ספר מבאר תורתו פונעם רבי'ן, וואס אנטהאלט פילצאליגע חידושי תורה, דברי תורה וואס דער רבי האט געזאגט דורכאויס די יארן, כתבי קודש וואס דער רבי האט געשריבן נאך אין זיינע יונגע יארן, און בפרט פון די לעכטיגע תקופה וואס ער האט משמש געווען ברבנות אין מאנטריאל.
אצינד ערשיינט לאור עולם די ערשטע באנד אויף ספר בראשית, וואס נעמט אריין מער ווי אכט הונדערט עמודים מלאים זיו ומפיקים, די ערשטע טראנספארט געפונט זיך אצינד אויפן וועג קיין אמעריקע, און איז ערווארטעט צו פארשפרייט ווערן אין די געשעפטן אין לויף פון די קומענדיגע טעג.
א גרויסע מסיבת לחיים איז ערווארטעט פארצוקומען ווען די ספרים קומען אן קיין ניו יארק, בביתו נאוה קודש פונעם רבי'ן זצ"ל אין בארא פארק, אין שפיץ פון די צוויי חשובע קינדער, כ"ק אדמו"ר מסקולען שליט"א, און כ"ק אדמו"ר מישועת יעקב סקולען שליט"א.
