שווערע נייעס הערט מען היינט ערב שבת קודש, אז א אינגערמאן וואס איז קריטיש פארוואונדעט געווארן אין א עלעוועיטאר עקסידענט וואס האט פאסירט דעם אנהייב וואך, איז ליידער נפטר געווארן פון די שווערע וואונדן ה"י.
די עקסידענט האט פאסירט דעם מאנטאג נאכמיטאג ביי די הצלחה סופערמארקעט אין מאנסי, ביי די הונטערשטע אפטיילונג פון די געשעפט, וואו דער אידישער ארבעטער האט זיך געפונען ביי א עלעוועיטאר וואס ווערט גענוצט ארויפצוברענגען פראדוקטן. אינמיטן די ארבעט האט ער פארלוירן קאנטראל אויף די עלעוועיטאר און איז צודריקט געווארן זייענדיג פארכאפט, חברה הצלה איז אנגעקומען און באהאנדלט דעם איד, און אים אפגעפירט אין שפיטאל זייענדיג אין א שווערן צושטאנד.
היינט פרייטאג הערט מען אז דער אינגערמאן ר' יצחק צבי קליין ע"ה איז ליידער נפטר געווארן פון די וואונדן, איבערלאזנדיג א צובראכענע אלמנה, ליידער אן קיין קינדערלעך נאך זיך. די לוויה קומט פאר היינט צוויי אזייגער נאכמיטאג אויפן מאנסי בית החיים.
