שטייענדיג סמוך ונראה צו די צווייטע הילולא קדישא פון כ"ק אדמו"ר הרה"ק מראחמיסטריווקא זצ"ל, וועלכער איז נפטר געווארן ערב ראש חודש אלול תשפ"ג, ומנוחתו כבוד אויפן בית החיים הר שלום אין מאנסי, אין די גרויסע חלקה דק"ק ראחמיסטריווקא וואס איז באנייעט געווארן אין די לעצטע יארן, גרייט מען זיך אצינד אויפצובויען אן אוהל אויפן ציון המצוינת, כנהוג מקדמת דנא.
די ציון הק' פונעם ראחמיסטריווקא רבי'ן איז אין די לעצטע קרוב צו צוויי יאר אויסגעשטיגן אלס א תל תלפיות פאר טויזענטער אידן וואס קומען דארט מתפלל זיין לישועת הכלל והפרט, צוליב טעכנישע סיבות איז נאכנישט געווען שייך אויפצובויען אן אוהל ביז היינט, ווען אויפן ציון המצוינת איז פארהאן א פראוועזארישע אוהל מיט די מינימאלע באדערפענישן לרווחת הציבור.
אצינד איז געמאלדן געווארן מטעם הנהלת חברה קדישא אז אין די קומענדיגע טעג וועט מען אין א מזל'דיגע שעה אנהייבן די בוי ארבעט אהערצושטעלן א פולשטענדיגע אוהל אויפן ציון הק', און צושטעלן אלע באדערפענישן לכבודו פונעם הייליגן צדיק און צו ברענגען הרחבת הדעת פאר די טויזענטער מתפללים ביים ציון הק', מיטן האפענונג אז צום היי יעריגן הילולא קדישא וואס געפאלט אין זעקס וואכן ארום, זאל די אוהל הק' שוין זיין פולקאם גרייט צום באנוץ.
ווי פארשטענדליך וועט די בוי ארבעט אויפן ארט צוימען די צוטריט צום ציון הק' דורכאויס די קומענדיגע וואכן, דעריבער איז די הנהלת החברה קדישא ארויסגעקומען מיט א רוף צום ציבור אויסצופאלגן די אנווייזונגען און זיכער מאכן אז מען לייגט זיך נישט אריין אין א סכנה בשעת די בוי ארבעט.
