שווערע נייעס קומט אריין פון די אידישע בית החיים אין שטאט טשערנאביל אין אוקראינע, אז א גרופע פארברעכער האבן וואנדאליזירט די ציון הק' פון צדיקי בית טשערנאביל נשמתם בגנזי מרומים, מקום מנוחת הקודש פונעם הייליגן מאור עינים זי"ע, זיין אייניקל הרה"ק רבי אהרן טשערנאבילער זי"ע, און זיינע צוויי קינדער הרה"ק רבי מנחם נחום און הרה"ק רבי ברוך אשר מטשערנאביל זי"ע.
די ציון הק' אין טשערנאביל האט שוין ליידער מיטגעמאכט אסאך שווערע צייטן, סיי אין די פריערדיגע יארן אונטער די סאוויעטישע פארבאנד, און סיי מיט עטליכע צענדליג יאר צוריק ווען עס האט פאסירט די טראגישע נוקלעארע עקסידענט אין טשערנאביל, וואס טוט נאך ביז היינט אפהאלטן באזוכער און מתפללים ביים ציון הק', ביז היינט ווען עס איז זייער שווער אנצוקומען אהין צוליב די אנגייענדע מלחמה אין אוקראינע.
בילדער וואס ערשיינען פונעם ציון הק' ווייזט אויף א פארברענטע געביידע, ווען די פארברעכער האבן אפגעברענט די קוויטלעך וואס געפונען זיך דארט, גערויבט פילע סידורים, און צובראכן די שלעסער וואס געפונט זיך אויפן טויער פונעם אוהל הק'. אידישע עסקנים אין אוקראינע געבן איבער אז זיי גרייטן זיך אריינצוגעבן א קלאגע פאר די פאליציי מיטן האפענונג צו קומען אויף די שפורן פון די פארברעכער.
