א דראמאטישע אנטוויקלונג שפילט זיך אפ אין ארץ ישראל, ווען די רעגירונג פארשטייער פון דגל התורה און אגודת ישראל האבן געמאלדן אז זיי גייען רעזיגנירן פון די קאאליציע און די רעגירונג, נאכפאלגענדיג די קלארע הוראה פונעם זקן ראשי הישיבות הגאון הגדול רבי דוב לאנדא שליט"א ראש ישיבת סלאבאדקע.
נעכטן האט דער ראש ישיבה אפגעשריבן א מכתב קודש צו די חברי כנסת פון דגל התורה, און ארויסגעברענגט מיט ווייטאג אז די ארטיגע רעגירונג טוט דירעקט רודפ'ן די בני תורה אין ארץ ישראל, און איז נישט גרייט אויסצוארבעטן א געזעץ וואס וועט לאזן די בני הישיבות עוסק זיין בתורה אן קיין שטער, דעריבער דארף מען טון וואס מען האט צו טון, און פארלאזן די רעגירונגס ביוראע'ן יעצט און שוין. אויפן בריוו האט אויך אונטערגעשריבן הגאון הגדול רבי משה הלל הירש שליט"א ראש ישיבת סלאבאדקע.
דורכ'ן טאג האט דער מדינת ישראל פרעמיער מיניסטער פרובירט צו ראטעווען זיין קאאליציע דורך פארשידענע וועגן, געארבעט אויף געזעצגעבער אהערצושטעלן א געזעץ וואס וועט צופרידנשטעלן די גדולי הדור, אבער נאך וואס ער האט עס נישט געקענט באווייזן, און נאך וואס די פאראנטווארטליכע האבן ליגנט געזאגט און פרובירט אויסצופאפן די יראי השם, האט דער ראש ישיבה הגאון רבי דוב לאנדא ווידער געלאזט הערן זיין קלארע דעת תורה אז מען דארף זאפארט פארלאזן די רעגירונג, און שטארק מחזק געווען די עסקנים איבער די געוואלדיגע קידוש השם וואס דאס וועט ברענגען איבער די גאנצע וועלט.
דורכאויס די נאכט האבן די חרדישע חברי כנסת פון דגל התורה און אגודת ישראל אריינגעגעבן זייער רעזיגנאציע, נאכפאלגענדיג מיט א מעלדונג פון די ש"ס פארטיי אז די ספרד'ישע גדולים וועלן זיך מארגן צוזאמזעצן אויף א דריגענדע אסיפה, וואס וועט ווארשיינליך פירן צו א רעזיגנציע פון די ספרד'ישע פארשטייער אין די רעגירונג.
