אין די יעצטיגע טעג נאך וואס כ"ק אדמו"ר מסאטמאר שליט"א האט פארלאזט קרית יואל, און ארויסגעפארן קיין ניו העמפשער אויף אפרוה פאר פיר וואכן, איז אונטערגענומען געווארן ספעציעלע רענאוואציע ארבעט דורך די הנהלת הקהילה אין קרית יואל, צו פראכטפול איבערבויען און פארשענערן דעם מזרח וואנט אין ביהמ"ד הגדול, דער מקום קדוש וואס איז שוין פארהייליגט נאנט צו א יובל יארן, און האט איינגעזאפט מיליאנען שעות תורה ותפילה דורכאויס די אלע יארן.
די ספעציעלע רענאוואציע פראיעקט איז נאך א רינגעלע אין די קייט פון הרחבת גבולי הקדושה, ווען די הנהלת הקהילה נעמט כסדר אונטער פרישע פראיעקטן צו פארגערעסערן און פארשענערן דעם בית הגדול לאלקים, און פארגרינגערן פאר די טויזענטער מתפללים מדי יום ביומו ומדי שבת בשבתו.
דעם מאנטאג האט מען אנגעהויבן מיט די ארבעט, אראפצונעמען די טיילס וואס האט ביז יעצט פארדעקט די מזרח וואנט, און עס איז אנטפלעקט געווארן די ארגינעלע ציגל וואס האט געדינט אלס פארמאלע מזרח וואנט פאר די ערשטע פאר יאר נאכן חנוכת בית המדרש. אצינד וועט מען ארויפשטעלן א נייע פראכטפולע און מאיעסטעטישע אויסזעהן וואס וועט צוברענגען גרויס פראכט פארן ביהמ"ד הגדול.
