אין די באקאנטע שטאט זיטאמיר אין אוקראינע, געפונט זיך א היסטארישע שוהל געביידע וואס איז געבויעט געווארן מיט איבער הונדערט יאר צוריק, און האט פאר לאנגע יארן געדינט אלס בית הכנסת פאר חסידי קארלין סטאלין וואס האבן געוואוינט דארט אין די געגנט.
די געביידע איז געבויעט פון האלץ, און איז שוין עטליכע מאל פארוואנדלט געווארן אין א הויפטקוואטיר פאר אנדערע אנגעלעגנהייטן, א שטייגער ווי א הוט געשעפט און א שיך געשעפט.
אין די צייט וואס די מלחמה אין אוקראינע בוזשעוועט דערווייל אן אויפהער, איז א פארשטייער פון די פאראייניגטע אידישע קהילה אין אוקראינע אנגעקומען אהין צו באזוכן די שוהל געביידע, אין ראם פון א לענגערע נסיעה צו פארזיכערן צענדליגע בתי מדרשים און אידישע געביידעס איבערן לאנד, זייענדיג דארט האט ער באמערקט א שווערע סצענע, אז א טייל פון די שוהל געביידע איז געווארן פארברענט, ווען די גענויע דעטאלן איז דערווייל נישט קלאר.
