במקום קדוש אויף די מערקאטאר גאס אין אנטווערפן, וואו עס ווערט אין די יעצטיגע טעג אויפגעבויעט א הערליכע נייע גרויסע בית המדרש דק"ק בית יצחק פשעווארסק, איז כ"ק אדמו"ר מפשעווארסק שליט"א ערשינען די נאכט באישן ליל, און געגאסן דעם אבן הפינה פאר די נייע שוהל, מיט די באטייליגונג פון א ענגע סוויטע מקורבים און חסידים ואנשי מעשה.
טראץ וואס אין די לעצטע פאר יאר האט מען דורכגעפירט פארשידענע רענאוואציע ארבעט צו פארגרעסערן דעם בית המדרש אויף פארשידענע וועגן, האט מען זיך געטראפן אין א דריגענדע נויט אויפצובויען א גענצליך נייע שוהל צו קענען אקאמאדירן דעם ריזן ציבור חסידים אין יעדע צייט, איבערהויפט אין די ימים הנוראים ווען ביז היינט האט מען ארויסגעדינגען די בית רחל זאל, אבער צוליב דעם רבינ'ס הויכע עלטער קומט עס אן גאר שווער.
מיט עטליכע וואכן צוריק האט מען איינגעווארפן די בנין בית המדרש וואס האט געדינט אלס אכסניא של תורה וחסידות דורכאויס די לעצטע צענדליגע יארן, בחיים חיותם פון הרה"ק רבי איציקל און הרה"ק רבי יענקעלע זי"ע די פשעווארסקע רביים, וואס האבן אין דעם בנין אפגעראכטן די עבודת הקודש בסילודין, און אויף דעם ארט האט כ"ק אדמו"ר מפשעווארסק שליט"א געפירט דעם ציבור די לעצטע אכט און צוואנציג יאר, זינטן איבערנעמען די כתר האדמורו"ת.
בהוראת הקודש פונעם רבי'ן האט מען געלאזט די מזרח וואנט עס זאל נאך האבן עפעס א שפור פון דעם הייליגן און נאסטאלגישן בנין בית המדרש, און די בוי ארבעט גייט אן אין פולן שוואונג, מיטן האפענונג אז די נייע בית המדרש זאל שוין זיין גרייט לקראת די ימים הנוראים הבאים עלינו לטובה.
היינט מאנטאג איז כ"ק אדמו"ר מפשעווארסק שליט"א ארויסגעפארן קיין ניס פראנקרייך, וואו דער רבי וועט וויילן די קומענדיגע וואכן אויף אפרוה ווי יאר יערליך. כנהוג איז פארגעקומען א מסיבת פרידה נעכטן זונטאג וואו דער רבי האט זיך געזעגנט מיט די חסידים און אויפגעטרעטן מיט דברות קודש. שפעט ביינאכט באישון ליל איז דער רבי ערשינען צום שטח הבניה צו א באשיידענע מעמד הנחת אבן הפינה, וואו עס האבן זיך באטייליגט די נאנטע מקורבים און א געקליבענע צאל חסידים ואנשי מעשה.
דער רבי האט געזאגט פרקי תהלים און מען האט געזינגען א פרייליכע ניגון, דער רבי האט אריינגעלייגט דעם אבן הפינה, און געשטעלט א שטיין פונעם איינגעווארפענעם בית המדרש, און אזוי אויך א שטיין מבית מדרשו של רבו, ביתו נאוה קודש פון הרה"ק מסאטמאר זי"ע אויף 500 בעדפארד עוועניו, וואס איז געברענגט געווארן דורך איינער פון די נאנטע מקורבים ביים רבי'ן.
