א אייגענארטיגע באזוך איז פארגעקומען היינט מיטאג במעון תורתו פונעם זקן ראשי הישיבות הגאון הגדול רבי דוב לאנדא שליט"א ראש ישיבת סלאבאדקע, אין די גבעת הישיבה אין בני ברק, ווען עס איז אריבערגעקומען אויף א באזוך דער אמעריקאנער אמבאסאדער אין ארץ ישראל מייק האקאבי, אינאיינעם מיט הרה"ג ר' דוד האפשטעטער שליט"א נשיא אירגון דרשו, וועלכער האט איבערגעטייטשט די שמועס אויפן פלאץ.
די באזוך האט זיך פארצויגן פאר נאנט צו א האלבע שעה, ווען דער סלאבאדקער ראש ישיבה האט געשמועסט מיטן אמבאסאדער איבער פארשידענע טעמעס, ווען איבער אלעם איז די שמועס געווען קאנצענטרירט אויף די שרעקליכע גזירה פון גיוס בני הישיבות וואס איז עומד על הפרק אין א ערנסטע צושטאנד, און דער ראש ישיבה האט געבעטן זיין הילף אין דעם געביט.
דער אמבאסאדער האט געזאגט פארן ראש ישיבה אז ער פארשטייט אז פונקט ווי עס פעלט זיך אויס צו האבן סאלדאטן צו פארזיכערן די עקזיסטענץ פון א לאנד, פונקט אזוי דארף מען האבן לומדי תורה צו געדענקן ווער מ'איז, אויף וואס דער ראש ישיבה האט קאמענטירט אז הלוואי זאלן אלע אידן דאס פארשטיין.
דער ראש ישיבה האט געבעטן פונעם אמבאסאדער צו איבערגעבן א פערזענליכע ביטע צום אמעריקאנעם פרעזידענט דאנאלד טראמפ, ער זאל זעהן ארויסצוהעלפן די לומדי תורה, און מיט קלארע ווערטער ערקלערט די געוואלדיגע זכות פון אויפהאלטן לומדי תורה, נאר א דאנק די עוסקים בתורה שטייט די וועלט, און מען מוז זעהן דאס צו שטיצן, און נישט חלילה שטערן דורך פארשידענע גזירות און רדיפת הדת.
דער ראש ישיבה האט געבעטן איבערגעבן א דאנק פארן אמעריקאנעם פרעזידענט פאר זיין שטענדיגע הילף, און געזאגט אז ער איז זיכער ער וועט טון וואס מעגליך צו ראטעווען די עקזיסטענץ פון די עולם התורה.
אויך איז דער אמעריקאנער אמבאסאדער געווען אויף א באזוך במעון תורתו פון הגאון הגדול רבי משה הלל הירש שליט"א ראש ישיבת סלאבאדקע, וואו מען האט ווידער ארומגעשמועסט איבער די שרעקליכע גזירה, און וואס מען קען אלס טון צו פארזיכערן די עולם התורה.
