מיט גרויס צער איז אנגעקומען די שווערע בשורה פון ארץ ישראל, איבער די פטירה פון הרבנית מנעשכיז ע"ה, הרבנית רייזל שטערן ע"ה, אשת חבר כ"ק אדמו"ר הרה"צ רבי בנציון ישראל שטערן זצ"ל מנעשכיז, און ברתא דמלכא פון כ"ק אדמו"ר משומרי אמונים זצ"ל בעל חוקי חיים.
די רעבעצין ע"ה איז געווען די פיפטע קינד פון כ"ק אדמו"ר משומרי אמונים זצ"ל, און געצויגן א הערליכע יחוס למעלה בקודש, צדיקי בית זוועהיל לדורותיהם. איר חשובער מאן דער נעשכיזער רבי זצ"ל איז געווען א זון פון הגה"צ רבי מאיר זאב שטערן זצ"ל גאב"ד מירון, און האט אנגעפירט א שיינע בית המדרש לתורה ולתפילה אין שטאט אשדוד.
מיט ארום צוועלף יאר צוריק איז איר מאן דער נעשכיזער רבי זצ"ל נפטר געווארן נאך א שווערע קרענק, און אצינד איז די רעבעצין נפטר געווארן אין עלטער פון צוויי און זיבעציג יאר, נאכן זיך מוטשענען א לענגערע צייט מיט א שווערע קרענק רח"ל.
די לוויה איז פארגעקומען היינט פרייטאג נאכמיטאג ביים נעשכיזער בית המדרש אין די רובע ז' געגנט אין אשדוד, אויפן וועג צום בית החיים אין אשדוד וואו זי איז געקומען לקבורה, איבערלאזנדיג א שיינעם דור ישרים יבורך, חשובע קינדער און אייניקלעך בליעה"ר. אזוי אויך האט זי פאר'אבל'ט די ברידער כ"ק האדמורי"ם משומרי אמונים שליט"א פון אשדוד, ירושלים, און קרית גת. און די שוועסטערס הרבנית מדעעש תליט"א אשת חבר כ"ק אדמו"ר מדעעש שליט"א, הרבנית מראדאשיץ תליט"א, אשת חבר כ"ק אדמו"ר מראדאשיץ זצ"ל, און נאך עטליכע געשוויסטער.
