היינט מיטוואך אויפדערנאכט ביי די גרויסע שמחת החתונה אין ביהמ"ד הגדול אין שיכון סקווירא, פון די כלה א אור אייניקל ביי כ"ק אדמו"ר מסקווירא שליט"א, איז געווארן איבערגעגעבן פארן רבי'ן א פערזענליכע וואונטש בריוו וואס דער אמעריקאנער פרעזידענט דאנאלד טראמפ ירום הודו, האט אפגעשיקט פארן רבי'ן לכבוד די שמחה במעון קדשו.
נאך די ערשטע טאנץ ביים זמן תפילת מעריב, זענען צוגעקומען צום רבי'ן דריי חשובע עסקנים, הרה"ח ר' ישראל משה שפיטצער הי"ו דער מעיאר פון שיכון סקווירא, הרה"ח ר' דוד כ"ץ הי"ו פון די נאנטע אידישע אויטאריטעטן צום אמעריקאנעם פרעזידענט, און הרה"ח ר' אהרן בנציון ווידער הי"ו ניו יארק סטעיט אסעמבלימאן, און פון די פירנדע עסקנים אין ראקלענד קאונטי.
די דריי האבן איבערגעגעבן פארן רבי'ן די בריוו וואס איז געלעגן אין א שיינע האלטער, און דער רבי האט עס געעפנט און געליינט מיט א קענטיגע הנאה און אינטערעסע, דער רבי האט זיך אינטערסירט ביי די עסקנים איבער זייער ארבעט און ווארעם געוואונטשן הצלחה און סייעתא דשמיא, און געהייסן אוועקלייגן דעם בריוו בביתו נאוה קודש.
