אין די צייט וואס אלפי חסידי באבוב 45 זענען נאך איינגעהילט אין א פריידיגע שטימונג, מיטן עפענונג פון די נייע ביהמ"ד הגדול מרכז העולמי באבוב 45 אינעם עיר ואם בישראל בארא פארק, א פרייליכע אנטוויקלונג וואס שפילט זיך שוין אפ עטליכע וואכן, פונעם מעמד קביעת מזוזה ערב שבת פרשת נצבים, ביז נעכטן נאכט ווען מ'האט ווידער געטאנצן ביים ערשטן שמחת החתונה ביים רבי'ן אין הויף וואס איז פארגעקומען אין די נייע בית המדרש, ווערט באריכטעט אז אויך דער אמעריקאנער פרעזידענט האט ארויסגעוויזן זיין פרייד מיט די שמחה'דיגע אנטוויקלונג.
אין די יעצטיגע טעג ווערט באקאנט אז פארלאפענעם חול המועד סוכות האט כ"ק אדמו"ר מבאבוב 45 שליט"א ערהאלטן א פערזענליכע בריוו פון פרעזידענט טראמפ ירום הודו, וואו דער פרעזידענט דרוקט אויס די געוואלדיגע דערגרייכונג מיטן באנייאונג פונעם ביהמ"ד אויף וואס די טויזענטער חסידים ווארטן שוין אזוי לאנג. די בריוו איז געווארן איבערגעגעבן פארן רבי'ן דורך הרב דוד כ"ץ שליט"א, פארזיצער פון די דזשואיש העריטעדזש פאנדעישאן, וועלכער האלט אן א נאנטע קשר מיט פרעזידענט טראמפ.
אינעם בריוו טוט דער פרעזידענט אויפברענגען היסטאריע, שרייבענדיג אז דער נייער בית המדרש איז אן המשכה פון די געוואלדיגע פעולות און השפעה פונעם דריטן באבוב'ער רבי'ן, ה"ה דעם רבינ'ס זיידע הרה"ק מבאבוב זי"ע, וועלכער האט אויפגעבויעט אידישקייט נאך די צווייטע וועלט מלחמה, און געהאט א געוואלדיגע השפעה אויפן אמעריקאנעם באדן.
