כ"ק אדמו"ר מדעעש אנטווערפן שליט"א איז היינט דינסטאג אריינגעפירט געווארן צו א גרויסע שפיטאל אין שווייץ, נאך וואס דער רבי שליט"א ליידט פון א סטראוק און איז אנגעוויזן אויף רחמי שמים.
דער רבי שליט"א וועלכער האלט זיך אויף די טעג אויף אפרוה אין שטאט דאוואס אין שווייץ, אין די צייט וואס רובא דרובא אייראפעאישער אידן געפונען זיך אויף די בערג לענגאויס די אייראפעאישע וואקאציע ערטער, האט זיך נישט גוט געשפירט די לעצטע פאר טעג, און איז געגאנגען צום דאקטער פאר אונטערזוכונגען.
נאך וואס דער דאקטער האט באשטעטיגט אז דער רבי ליידט פון א סטראוק רח"ל, האט מען אריינגעפירט דעם רבי'ן צו א גרויסע שפיטאל אין שווייץ, אויף באהאנדלונגען און אבזערוואציעס מיטן האפענונג צו סטאביליזירן די מצב, אידישע קינדער ווערן געבעטן צו דאווענען לרפואתו, כ"ק הרה"צ רבי שמואל חיים יחזקאל בן יוכבד בתוך שאר חולי ישראל.
