טויזענטער תלמידי וחסידי סאטמאר זענען איינגעהילט אין א זעלטענע התרגשות, זיך גרייטענדיג צו די הייליגע טעג הממשמשים ובאים, ווען נאך לאנגע יארן וועט מען באנייען דעם פריש איבערגעבויעטן בית המדרש הגדול דקהל יטב לב ד'סאטמאר, בית מדרשו של רבי וואו הרה"ק מסאטמאר זי"ע האט אפגעראכטן די עבודת הקודש בחיים חיותו.
די נאסטאלגישע בית המדרש אויף ראדני סטריט איז א מקום קדוש וואס ברענגט אויף רירנדע הרגשים ביי יעדן סאטמארער חסיד, דאס ארט וואו מען האט זיך געווייקט און זיך מסתופף געווען ביי די פריערדיגע צדיקים, באותו מקום וואו כ"ק אדמו"ר מסאטמאר שליט"א רעכט אפ די עבודת הקודש די לעצטע נאנט צו צוואנציג יאר, נאכן איבערנעמען די כתר האדמורו"ת. די בליה און וואוקס פונעם ציבור האט בלויז צוגעברענגט א שווערע געדרענג, וואס האט געצווינגען די עסקני הקהילה אונטערצונעמען א מאסיווע בוי פראיעקט אין די לעצטע פאר וואכן.
ווי באריכטעט מיט עטליכע וואכן צוריק, האט מען פארשלאסן דעם היכל בית המדרש אויף צייטווייליג צו קענען אנגיין מיט די בוי ארבעט, צונעמענדיג די אינעווייניגסטע חלקים אינעם בנין צו קענען ארויפבויען די ווייבער שוהל מיט א שטאק העכער, צו ערמעגליכן דאס אויפשטעלן הויכשטאקיגע פארענטשעס, און העכערע גאלעריעס פאר די מתפללים אין די הייליגע טעג.
שטייענדיג שוין נענטער ווי ווייטער צו די ימי הסליחות, מיט קארגע דריי טעג אפגערוקט למוצאי מנוחה, האט די הנהלת הקהילה געמאלדן איבער די געוואלדיגע פארשריט און די פלענער אויף ווייטער, זיך גרייטענדיג צו עפענען דעם היכל בית המדרש פאר די תפילות דעם א' סליחות און די ימים הנוראים.
טראץ וואס די בוי ארבעט האלט נאך אין פולן שוואונג, וועט עס אפגעשטעלט ווערן דורכאויס גאנץ חודש תשרי, צו ערמעגליכן דאס באנוץ פונעם פיל פארברייטערטן היכל בית המדרש פאר די לעכטיגע תפילות און טישן אינעם ירח האיתנים, און נאך די ימים טובים וועט מען פאראויסגיין מיט די ווייטערדיגע ארבעט צו פראכטפול פארענדיגן דעם בנין לשם ולתפארת, כראוי וכיאות לכבוד בית ה'.
די בית המדרש וועט געעפנט ווערן דעם זונטאג פארטאגס צום אמירת סליחות הראשונות, ווען די חלל בית המדרש וועט זיין כמעט ליידיג פארן ציבור האלפים, מיט בלויז עטליכע הונדערט בענקלעך פאר די זקני וחשובי העדה. באלד נאך סליחות וועט מען צוריק פארשפארן דעם היכל צו קענען פאראויסגיין מיט די בוי פראיעקט, אהערצושטעלן דעם היכל ווי עס פאסט פאר די ימים הנוראים.
בעז"ה ווען די בוי ארבעט וועט זיין גענצליך פארטיג, וועט זיך אנטפלעקן א פראכטפול בילד פון א שפאגל נייע בית המדרש אבער אויפן אלטן נאסטאלגישן פארנעם ווי אמאל, בית מדרשו של רבי במלוא מובן המילה. עס ווערט צוגעברענגט צוויי נייע היכלי התורה, פינף נייע דאווענען שטיבלעך, און ווי דערמאנט א מעגליכקייט צו בויען הויכע פארענטשעס און גאלעריעס אין די פארנומענע זמנים אין יאר.
