תושבי וויליאמסבורג נעמען אויף מיט שטארקע פרייד די מעלדונג פון די שטאטישע באאמטע, אז דאס יאר ראש השנה ביינאכט וועט בעדפארד עוועניו זיין פארשלאסן פאר קאר טראפיק, צו ערמעגליכן די פוסגייער פלוס מיט טויזענטער אידן וואס גייען וואונטשן לשנה טובה פאר עלטערן, זיידעס און באבעס, רבי'ס און רבנים, וכל הקהל הקודש.
פאר וויליאמסבורגער אידן דארף מען נישט מסביר זיין וויאזוי בעדפארד עוועניו זעהט אויס ראש השנה ביינאכט, ווען טויזענטער אידן שטראמעם אין די מאסן לברך ולהברך, וואונטשן א גוט געבענטשט יאר פאר נאנטע און באקאנטע. אלע יארן ביז היינט איז געווען גאר שווער צו גיין, ווען קארס זענען געפארן אויפן גאס ווי געווענליך, און האט עטליכע מאל שיעור צוגעברענגט טראגעדיעס אויפן גאס און ארום.
נאך לענגערע השתדלות פון די וויליאמסבורג אידישע קאמיוניטי קאונסיל, האט די ניו יארק סיטי פאליציי געמאלדן אז היי יאר וועט מען אפשליסן בעדפארד עוועניו ראש השנה ביינאכט, פון ניין אזייגער ביז עלף אזייגער, צווישן פלאשינג עוועניו און דיוויזשאן עוועניו.
