ווי יאר יערליך גרייט מען זיך אויף די גרויסארטיגע עצרת תפילה שטייענדיג אין די עשרת ימי תשובה, ווען עס קומען זיך צוזאם טויזענטער תינוקות של בית רבן פון אלע שיכטן און קרייזן, און רייסן איין ביים בורא כל עולמים לישועת הכלל והפרט.
די גרויסע עצרת תפילה גייט שוין אן העכער דרייסיג יאר, ווען די באקאנטע מתעסקים ארגענעזאציע שטעלט אהער דעם פראגראם אויף א יערליכע פארנעם בין כסא לעשור, און איז פארגעקומען פאר צענדליגע יארן בהיכל ביהמ"ד הגדול באבוב אין בארא פארק.
דאס יאר איז ערמעגליכט געווארן אפצודינגען די גרויסע זאל אינעם בנין פון תלמוד תורה בעלזא, וואו עס איז פארהאן פיל מער פלעצער צו קענען אקאמאדירן די נאכאנאנדע וואוקס פון תלמודי תורה און תינוקות של בית רבן, וואס וואקסט פון יאר צו יאר כן ירבו.
די גרויסע עצרת וועט פארקומען מארגן מאנטאג מיטאג, און אצינד ווערן שוין געמאכט די העפטיגע צוגרייטונגען אויף אלע פראנטן דורך די עסקני העיר.
