א שרעקליכע וואנדאליזם האט זיך אפגעשפילט די נאכט אין שטאט וויזניץ אין אוקראינע, ווען עטליכע פארשוינען האבן צובראכן מציבות און די צוים וואס נעמט ארום די לאקאלע בית החיים, וואו עס ליגן באערדיגט פילע צדיקים וקדושי עליון, דארונטער די הייליגע צדיקים לבית וויזניץ, הרה"ק בעל צמח צדיק זי"ע, און הרה"ק בעל אמרי ברוך זי"ע.
מיט בלויז צוויי טעג צוריק האבן פילע אידן פוקד געווען דעם ציון הק' פונעם הייליגן צמח צדיק זי"ע, בעצם יומא דהילולא קדישא וואס איז אויסגעפאלן כ"ט תשרי ערב ראש חודש חשון, אבער נעכטן ביינאכט האט זיך ליידער אפגעשפילט די שרעקליכע געשיכטע, ווען געוויסע עלעמענטן האבן צובראכן די שטיינערנע וואנט פון די בית החיים, און אראפגעווארפן עטליכע מציבות אויף די ערד מיט א שרעקליכע בזיון.
די עסקנים פון "הגן הנאה" וואס גיבט זיך אפ מיט אלע אנגעלעגנהייטן צו פאראייביגן די מקומות הקדושים פון די וויזניצע דינאסטיע אין אייראפע, האבן אריינגעגעבן א קלאגע צו די לאקאלע פאליציי, וועלכע האט געעפנט א אויספארשונג צו כאפן די פארברעכער, אין די נאנטע טעג גרייטן זיך די עסקנים צוריקצושטעלן אלעס אויפן פלאץ, טראץ וואס די שאדן ווערט געשאצט אין די הויכע נומערן.
