אלפי חסידי וויזניץ בארצות הברית גרייטן זיך בהכנה דרבה צו די געפלאנטע מסע הקודש פון כ"ק אדמו"ר מוויזניץ שליט"א לרפואה שלימה, וועלכער גרייט זיך ארויסצופארן אין די קומענדיגע וואכן קיין אמעריקע, לפאר על ראש שמחתו ביי די גרויסע שמחת החתונה במעון קדשו, די חתונה פונעם יונגסטן קינד ביים רבינ'ס עלטסטע איידעם הגה"צ ר' יצחק טווערסקי שליט"א, זון פונעם רבינ'ס עלטערע שוואגער כ"ק אדמו"ר מסקווירא שליט"א.
די שמחת החתונה איז באשטימט אויף אנהייב חודש כסלו, אין גענוי א חודש פון היינט, מאנטאג פרשת ויצא ד' כסלו, און וועט פארקומען בעז"ה אינעם גרויסן בנין ביהמ"ד החדש אין שיכון סקווירא, א שמחה גדולה וואס וועט בעז"ה אפגעראכטן ווערן מיט גרויס התרגשות, און וועט מיטן אויבערשטנס הילף באשיינט ווערן דורכ'ן גרויסן זיידן פון ארץ ישראל כ"ק אדמו"ר מוויזניץ שליט"א.
טראץ וואס דער וויזניצער רבי שליט"א האלט נאך א שווערע יאר פון מעדיצינישע באהאנדלונגען, און האט זיך ליידער נאך אלס נישט פולקאם ארויסגעדרייט פון די ביטערע מחלה ה"י, גייענדיג ווייטער אויף באהאנדלונגען, האט דער רבי שליט"א אויסגעדרוקט רצון קדשו ארויסצופארן פערזענליך קיין אמעריקע צו באשיינען די שמחה, נאך וואס די שמחה איז אזוי קרוב ללבו ווען מ'גרייכט דעם גרויסן מאמענט, ווען זיין עלטסטן טאכטער מאכט חתונה דאס יונגסטע קינד בשעה טובה ומוצלחת.
צוליב דעם רבינ'ס מצב הבריאות איז נאכנישט באשטימט געווארן קיין גענויע פלענער וועלכע טאג דער רבי וועט ארויספארן, אבער לויט די יעצטיגע פלענער וועט דער רבי וויילן אין שיכון סקווירא דורכאויס דעם באזוך, אינעם קביעות'דיגן אכסניא ביי הנגיד החסיד ר' אביגדור עסטרייכער הי"ו מראשי הקהילה אין שיכון סקווירא. אין די יעצטיגע טעג ווערן געמאכט די נויטיגע צוגרייטונגען בבית האכסניא, ווען הנגיד החסיד ר' אביגדור האט צוגעבויעט א נייע פליגל צו זיין הויז מיט וויכטיגע איינריכטונגען פארן רבי'ן אינעם יעצטיגן מצב, ווי אן עלעוועיטאר, און נאך פארשידענע זאכן וואס פעלט זיך אויס פארן רבינ'ס הרחבת הדעת.
אזוי אויך ווערט געפלאנט א גרויסע שמחה אנהייב פון די ימי השמחה, ווען עס וועט געפראוועט ווערן די שמחת הבר מצוה פון א אייניקל ביים רבי'ן, הב' משה יהושע נ"י, זון פון בנו הגדול הגה"צ רבי חיים מאיר האגער שליט"א אב"ד קרית וויזניץ ב"ב, און וועט פארקומען בעיר מושבו פונעם בעל שמחה אין ניו יארק, במקהלות אלפי חסידים ואנשי מעשה.
