היימישע אידן אין אמעריקע נעמען אויף די פרישע נייעס יוצא מבית המשפיע, אז דער בארימטע מלהיב לבבות ישראל, הגה"צ רבי צבי מאיר זילבערבערג שליט"א ראש חבורת נחלת יעקב גרייט זיך אין די נאנטע וואכן אונטערצונעמען א מסע הקודש קיין אמעריקא לטובת די הייליגע מוסדות נחלת יעקב, מיסודו ובנשיאתו פונעם חשובע'ן משפיע שליט"א.
ווי שוין געמאלדן מיט עטליכע חדשים צוריק, איז באשטימט געווארן די היסטארישע נסיעה דורכ'ן משפיע צו אויפטרייבן גרויסע סכומים לטובת מוסדותיו הקדושים, ארגינעל איז געווען געפלאנט אפצוהאלטן א גרויסארטיגע מעמד אינמיטן די זוממער אין די הערליכע מאיעסטעטישע ראבערט טרי האטעל אין נוארק ניו דזשערזי, אבער צוליב די שווערע מלחמה אין ארץ ישראל איז עס געווארן אפגערופן אין די לעצטע מינוט.
אצינד איז באשטעטיגט געווארן די פרישע פלענער אז די היסטארישע נסיעה וועט פארקומען נאך דעם חודש חשון, מיט א היסטארישע מעמד "כולנו שותפים" וואס וועט פארקומען זונטאג פרשת תולדות כ"ה חשון. אין די צייט וואס נאך פילע חסידים ומעריצים האבן זיך אנגערופן צו זיין א טייל פון דעם היסטארישן מעמד, האבן די עסקנים געדארפט ארויסדינגען פיל א גרעסערע לאקאל, און דערפאר איז באשטימט געווארן די גיגאנטישע זאל "וועסטשעסטער קאונטי סענטער" אלס אכסניא פאר די גרויסארטיגע מעמד.
די עסקנים, בראש פון העסקן ר' יעקב יוסף בערגער פון די באקאנטע 'טריפל בי' קארדענעישענס פירמע, ארבעטן אריין טעג און נעכט און גייען איבער אלע פרטי פרטים פון די גרויסע ערשטמאליגע מעמד און נסיעה לטובת די הייליגע מוסדות המנוסס לשם ולתפארת.
