די בני ציון בארץ הקודש גרייטן זיך צו מקיים זיין דעם "יגילו במלכם", ווען עס ווערט באקאנט די פרייליכע מעלדונג אז כ"ק אדמו"ר מבאבוב שליט"א גרייט זיך אונטערצונעמען א געהויבענע מסע הקודש קיין ארץ ישראל, צו מחזק זיין קהל עדת צאן מרעיתו תושבי ארץ הקודש, און באשיינען א רייע מעמדים אפצוצייכענען די הרחבת גבולי הקדושה אינערהאלב די קהילות און מוסדות באבוב בארץ הקודש.
די הויפט ציהל פון די מסע הקודש איז צו באשיינען עטליכע מעמדי הרחבת גבולי הקדושה אינעם קהילה. אין די לעצטע יארן, אינטער'ן השפעה פונעם רבי'ן איז די קהילה אין אר"י זיך גאר שטארק צוואקסן און פארנעמט היינט מערערע כוללים, ישיבות, בתי חינוך, און העכער צען שטיבלעך אויסגעשפרייט איבער'ן לאנד.
די מסע הקודש, די ערשטע אין עטליכע יאר זינט די שווערע מצב מלחמה, איז באשטימט אויף סוף חודש שבט, ווען דער רבי שליט"א וועט אנקומען קיין ארץ ישראל און פראווענען א געהויבענע שבת בקרתא דשופריא 'קרית באבוב' אין בת ים, שבת שקלים ברוב עם הדרת מלך. פון איבער אלע שטעט אין אר"י וועלן הונדערטער חסידים קומען צו פארן מיטהאלטן דעם געהויבענעם שבת.
אין די יעצטיגע טעג קומען פאר מערערע אסיפות און באראטונגען צווישן די טעטיגע עסקנים אויסצוארבעטן אלע דעטאלן ארום די געהויבענע מסע הקודש, סיי מיטן אויסשטעלן די מעמדי קודש דורכאויס דעם ביקור המרומם, און סיי מיטן צושטעלן די לאגיסטישע חלקים ווי הכנסת אורחים פאר די פילע געסט און אלעס אנדערש וואס פעלט זיך אויס.
