יעצט ביינאכט אין ארץ ישראל איז באשטעטיגט געווארן מטעם בית כ"ק אדמו"ר מוויזניץ שליט"א לרפו"ש, אז דער רבי שליט"א וועט בעז"ה אונטערנעמען א מסע הקודש קיין אמעריקע לפאר על ראש שמחותיו, דעם קומענדיגן פרשת ויצא הבעל"ט ווען עס וועט פארקומען צוויי חתונות במעון הקודש פונעם רבי'ן.
מיט עטליכע וואכן צוריק האבן מיר באריכטעט איבער די פלענער און צוגרייטונגען פאר די געהויבענע נסיעה, אבער צוליב דעם רבינ'ס מצב הבריאות וואס איז נישט אזוי אמבעסטן, האט מען נישט געקענט אויסשטעלן קיין גענויע פלענער ביז א קורצע צייט בעפאר די נסיעה.
אצינד איז באשטעטיגט געווארן אז דער רבי שליט"א וועט זיך ארויסלאזן אין וועג קומענדיגן מוצאי שבת קודש פרשת תולדות, און זיין צוגאסט אין ניו יארק פאר א פולער וואך, ווען דער רבי שליט"א וועט באשיינען די שמחת החתונה פון די כלה יונגסטע קינד ביים עלטסטן איידעם הגה"צ ר' יצחק טווערסקי שליט"א, בן כ"ק אדמו"ר מסקווירא שליט"א, וואס וועט פארקומען בעז"ה מאנטאג פרשת ויצא אין ביהמ"ד הגדול אין שיכון סקווירא.
צוויי טעג דערויף, מיטוואך פרשת ויצא הבעל"ט, וועט פארקומען אין מאנסי די שמחת החתונה פון נאך א אייניקל ביים רבי'ן, די כלה א טאכטער פון זיין איידעם הגה"צ ר' נפתלי צבי טייטלבוים שליט"א, זון פון הגה"צ אבד"ק וואלאווע שליט"א, מיט די חתן א זון פון הרב שמעון מוטצען שליט"א מחשובי חסידי צאנז קלויזענבורג אין מאנסי. לויטן פלאן וועט די מעמד קבלת פנים און חופה און מצוה טאנץ פארקומען אין ביהמ"ד הגדול אין שיכון וויזניץ מאנסי, און די סעודת החתונה און די ריקודין אין זאל פון אטריום פלאזא.
די התרגשות ביים ציבור חסידי וויזניץ אין אמעריקע שטייגט גאר שטארק, הערנדיג אז דער רבי וועט בעז"ה מופיע זיין בשערי העיר, און מ'וועט זיך קענען מיטפרייען ביי די צוויי שמחות במעון קדשו. אין די זעלבע צייט איז מען ווייטער מתפלל אז דער רבי זאל האבן א רפואה שלימה און זיך ערהוילן ווי אמשנעלסטן, צוריקקומען צו די כוחות בבריות גופא ונהורא מעליא.
