אידישע קינדער איבער די גארער וועלט נעמען אויף מיט גרויס דערלייכטערונג און זאגן דעם ברכה "הטוב והמטיב", נאכן הערן די פאזיטיווע אנטוויקלונג אין די דראמאטישע קעיס פון דער איד "בנימין כאסין נ"י" וועלכער איז פאראורטיילט געווארן צו טויט שטראף אינעם ווייטן איראק, אז די ארטיגע געריכט האט אנולירט די טויט שטראף אורטייל, מיטן הילף פון אידישע עסקנים וואס האבן אריינגעלייגט אומגעהויערע עסקנות און שתדלנות דערויף.
די געשיכטע האט זיך אנגעהויבן מיט צוועלף יאר צוריק, ווען בנימין וועלכער איז געבוירן געווארן אין קורדיסטאן איראק, איז צוריקגעפארן צו זיין געבורטשטאט צו באזוכן זיינע עלטערן, ער איז געווען פארמישט אין א פאטאלע געפעכט, אונטער וואס מען האט אים אריינגעשליידערט אין טורמע, און עווענטועל האט מען אים פאראורטיילט צו טויט שטראף אויפן פארלאנג פון די פאמיליע פון דעם פאטאליטעט.
העפטיגע עסקנות איז געלאזט געווארן אין גאנג, איבערהויפט דורך א גרופע עסקנים פון מאנסי, העסקן ר' שמעון ראלניצקי הי"ו וועלכער האט אויפגעדעקט די שוידערליכע געשיכטע אין א לענגערע ארטיקל אין "די שריפט", העסקן ר' מאיר צבי טויבער הי"ו, העסקן ר' הערשל גאטדינער הי"ו, העסקן ר' שלמה לאנדא הי"ו, דער באקאנטער פרומער אדוואקאט ר' אברהם (אלען) לאווי הי"ו, ועל צבאם הגה"צ רבי חיים יוסף דוד ווייס שליט"א דומ"ץ סאטמאר אנטווערפן, וועלכער איז שוין לאנגע יארן באקאנט מיט זיין אומבאשרייבליכע שתדלנות און עסקנות פאר פדיון שבוים.
גאר אסאך ארבעט איז אריין צו שתדל'ן ביי די ארטיגע אינסטאנצן, איבערצורעדן די פאמיליע אנצונעמען א געלט שטראף אנשטאט ארויסשטעלן דעם איד צום טויט רח"ל, עווענטועל איז געלאזט געווארן אין גאנג א גרויסע געלט קאמפיין, וואו אידישע קינדער מארבע כנפות הארץ האבן צונויפגעשטעלט שווערע הונדערטער טויזענטער דאללארן ארויסצוהעלפן די געריכטליכע פראצעדור.
היינט הערט מען ב"ה די פאזיטיווע אנטוויקלונג, אז דורכאויס א באזוך פון די ראשי העסקנים, ובראשם דער סאטמארער דיין פון אנטווערפן, ביי די געריכט הויפטקוואטירן אין קורדיסטאן איראק, האט דער ארטיגער ריכטער אפיציעל אנולירט דעם טויט שטראף אורטייל, און עס אויפגעטוישט מיט א מינימאלע טורמע טערמין, וואס וועט האפנטליך אויך קענען געשניטן ווערן מיטן אויבערשטנס הילף.
ווי די ארטיגע טראדיציע איז פארגעקומען א ספעציעלע צערעמאניע וואס ווערט אנגערופן "סולכא", וואו די משפחה האט געגעבן א פארמאלע פארצייאונג פארן איד, מיט די אנוועזנהייט פון די ארטיגע שבטים עלטסטע, און דערנאך האט דער ריכטער באשטעטיגט דעם סולכא דאקומענט און אנולירט דעם שרעקליכן גזר דין.
עס האט נאכגעפאלגט מיט א רירנדע באזוך פון דער סאטמארער דיין און די עסקנים ביים איד אין טורמע, וואו ער האט באקומען די זעלטן פריידיגע נייעס און געזאגט די ברכה "הטוב והמטיב", שיקענדיג פרייד כוואליעס איבער די גאנצע וועלט, פאר כל כלל ישראל וואס שפירן דעם ערבים זה לזה.
