דאס יהדות החרדית אין ניו יארק גרייט זיך מקבל צו זיין בהדרת כבוד דעם חשובן גאסט פון ארץ ישראל, כ"ק הגה"צ גאב"ד מאקאווא שליט"א, וועלכער נעמט אונטער דעם לאנגן רייזע קיין אמעריקע פארן איינעם ציהל, אוועקצושטעלן א יסוד איתן פאר ישיבתו הקדושה "עטרת משה מאקאווא" המתנוסס לתפארה אינעם שטאט קרית אתא.
איבער פערציג יאר איז שוין אדורך זינט דער רב שליט"א האט איבערגענומען דעם עול ההנהגה, זייענדיג ממלא מקום אביו הגדול הרה"ק בעל עטרת משה ממאקאווא זי"ע, פון וועמענס הילולא קדישא מען שטייט בלויז צוויי טעג דערויף. דער מאקאווא רב זצ"ל האט געלאזט א צוואה פאר בנו הגדול דער רב שליט"א ער זאל פארזעצן מיט הרבצת התורה מיטן עפענען א ישיבה אין קרית אתא, און אצינד איז דאס נתקיים געווארן במלוא מובן המילה, מיטן עפענונג צום יעצטיגן שנת הלימודים, די נייע ישיבה לצעירים "עטרת משה מאקאווא", אינעם גרויסן בנין הישיבה אין קרית אתא.
בחורי חמד מצויינים זיצן און הארעווען אין לערנען, ווען מ'האט די זכיה ליהנות מזיו אורו פונעם רב שליט"א וועלכער איז כסדר משפיע אויף זייערע אינגע הערצער, אצינד האט דער רב שליט"א באשלאסן צו נעמען דעם וואנדער שטעקן און זיך ארויסלאזן אויפן וועג קיין ניו יארק, צו מזכה זיין תלמידיו חסידיו ומעריציו דאהי, צו נעמען א טייל אוועקצושטעלן א פינאנציעלן שטאנד פאר די ישיבה הקדושה.
קומענדיגן מוצאי שבת וועט זיך דער רב שליט"א ארויסלאזן על אם הדרך, און גרייכן די ניו יארקער האפן זונטאג פארטאגס. דורכאויס די וואך פון פרשת תולדות וועט זיך דער רב שליט"א אויפהאלטן אין מאנסי, בבית האכסניא ביי הרבני הנגיד ר' יודא דוד רובינשטיין הי"ו, און א רייע מסיבות און באנקעטן וועט פארקומען דורכאויס די וואך בבתי נדיבים בעם וואס וועלן שענקן גרויסע סכומים להחזקת הישיבה.
א גרויסע שבת ווערט געפלאנט פארצוקומען אינעם עיר ואם בישראל בארא פארק, וואו דער רב שליט"א וועט בעז"ה פראווענען דעם קומענדיגן שבת קודש פרשת תולדות. מאנטאג ויצא וועט דער רב פארלאזן ניו יארק, און אנקומען קיין אונגארן צו פוקד זיין דעם ציון הק' פון זקינו דער הייליגער מנוחת אשר פון טשענגער זי"ע, בעצם יומא דהילולא קדישא ה' כסלו.
