דעם היינטיגן טאג זונטאג פרשת תולדות כ"ה חשון, האט דאס יהדות החרדית אין ניו יארק זוכה געווען צו מקבל פנים זיין אחד מגדולי הדור פון ארץ ישראל, כ"ק מרן גאב"ד מאקאווא שליט"א, וועלכער האט זיך ארויסגעלאזט אויף דעם לאנגן רייזע קיין ניו יארק אויפצוטרייבן גרויסע געלטער לטובת ישיבתו הק' אין קרית אתא.

ווי באקאנט האט דער מאקאווא רב שליט"א מייסד געווען די הייליגע ישיבה "עטרת משה מאקאווא", לשמו ולזכרו תאוות נפש פון זיין גרויסן פאטער הגה"ק בעל עטרת משה ממאקאווא זי"ע, וועלכער האט געלאזט א צוואה פאר בנו הגדול דער רב שליט"א  ער זאל פארזעצן מיט הרבצת התורה מיטן עפענען א ישיבה אין קרית אתא. אזוי ווי דער רב שליט"א האט זיך אויסגעדרוקט ביים התייסדות הישיבה, אז די נאמען "עטרת משה" איז גאר פאסיג, וויבאלד עס איז א קרוין פארן טאטן.

בחורי חמד מצויינים זיצן און הארעווען אין לערנען, ווען מ'האט די זכיה ליהנות מזיו אורו פונעם רב שליט"א וועלכער איז כסדר משפיע אויף זייערע אינגע הערצער, אצינד איז דער רב שליט"א ארויסגעפארן אויף דעם לאנגן נסיעה צו שאפן די פינאנציעלע הילף פון חסידיו ומעריציו, צו קענען אויפהאלטן דעם הייליגן מקום תורה, להגדיל תורה ולהאדירה.

נעכטן מוצאי שבת קודש איז דער רב שליט"א ארויסגעפארן על אם הדרך, און היינט פארטאגס האט דער רב געלאנדעט אין ניו יארק, וואו עס האבן אפגעווארט פילע חסידים ומעריצים. דער רב שליט"א איז אריינגעפארן קיין מאנסי לבית האכסניא ביי הנגיד החסיד ר' יודא דוד רובינשטיין הי"ו וואו ער וועט זיך אויפהאלטן דורכאויס די וואך.

מטעם ביתו נאוה קודש פונעם רב שליט"א איז געמאלדן געווארן, אז מען קען אריינגיין אל הקודש פנימה להיזכר לטובה, און נהנה זיין עצה ותושיה ביי די זמני קבלת קהל, מען קען זיך פארבינדן צום משמש בקודש אויפן נומער 929.376.7794