די חסידישע ישוב אין סטעטן איילענד שפרודלט און שיינט מיט יעדע פארבייגייענדע טאג, און אצינד האט די הרחבת גבולי הקדושה אינערהאלב די וויזניצע קהילה אריינגעברענגט גרויס פרייד ביי אלע חסידישע איינוואוינער אין שטאט, איבערהויפט פאר חסידי וויזניץ וואס קוקן שוין לאנג ארויס אויף דעם ערווארטעטן מאמענט.
די וויזניצע קהילה פארמאגט א שיינע ציבור חסידים ומתפללים, און די נויט אהערצושטעלן א אייגענע בנין קבע זעהט זיך שוין אן א לאנגע צייט. אין די יעצטיגע טעג איז די הנהלת הקהילה אריין אין קאנטראקט אפצוקויפן א אייגענע שטח וואו עס וועט אויפגעבויעט ווערן א פראכטפולע בנין פארן בית המדרש, און אין די נאנטע וואכן האפט מען צו גומר זיין די מקח אין א מזל'דיגע שעה.
די נייע שטח אויף האראלד סטריט אין סטעטן איילענד, נעמט אריין א גרויסע לאט פון אכט טויזענט סקווער פיס, און האט אפגעקאסט די סומע פון איבער א מיליאן דאללער, די עסקני הקהילה זענען אקטיוו צו פאראויסרוקן דעם גמר המקח, מיטן האפענונג אז אויף יו"ט פסח וועט מען זיך שוין קענען אריינציען אויף צייטווייליג, אין די צייט וואס א גרויסע הערליכע בנין ביהמ"ד וועט בעז"ה געבויעט ווערן אין די נאנטע צוקונפט.
