היינט איז געמאלדן געווארן די פלענער איבער א געהויבענע מסע הקודש וואס כ"ק אדמו"ר מסאטמאר שליט"א וועט אונטערנעמען קיין אייראפע, דאסמאל צום באקאנטן שטאט מאנטשעסטער אין ענגלאנד, וואו עס איז פארהאן א גרויסע סאטמארע קהילה מיט מוסדות הקדושים.
די נסיעה איז באשטימט אויף אנהייב פרשת תרומה, ווען דער רבי שליט"א וועט מופיע זיין בשערי העיר אויף א צוויי טאגיגע באזוך, פון מאנטאג פרשת תרומה ביז דינסטאג ביינאכט ראש חודש שבט. די הויכפונקט פון די מסע הקודש וועט זיין די מעמד חנוכת הבית פאר די שפאגל נייע פראכטפולע היכל התורה "לב אהרן" וואס איז נארוואס פארענדיגט געווארן מיט גרויס פראכט לכבוד התורה ולומדיה.
די נייע היכל התורה איז די ערשטע היכל התורה וואס ווערט געעפנט אין שטאט, און די טויזענטער תושבי העיר קוקן שוין לאנג ארויס אויף דעם פרייליכן מאמענט. מאנטאג נאכט וועט דער רבי שליט"א באשיינען די מעמד חנוכת הבית און קביעת מזוזה אינעם היכל התורה, אינאיינעם מיט די סעודת הילולא לרגל די הילולא קדישא פונעם רבינ'ס זיידן הרה"ק בעל קדושת יום טוב מסיגעט זי"ע וואס געפאלט כ"ט שבט ערב ראש חודש אדר.
