אין די יעצטיגע טעג איז געמאלדן געווארן דורך די הנהלה פון אלע תלמודי תורה דחסידי קארלין סטאלין אין ארץ ישראל, אז צום קומענדיגן לערן יאר ווערט אוועקגעשטעלט א נייע ארגאנעזירטע לבוש פאר אלע ילדי התלמוד תורה, אזוי ווי עס איז שוין איינגעפירט אין פילע חסידישע חדרים אין ארץ ישראל.
דאס קומט נאכדעם וואס אין עטליכע שטעט אין ארץ ישראל האט מען שוין איינגעפירט א קביעות'דיגע לבוש פאר די קינדער אין חדר, צו פארמיידן פארשידענע פראבלעמען סיי בעניני צניעות ביי קינדער און סיי צו פארגרינגערן פאר די עלטערן מיט די הויכע קאסטן.
אצינד האבן די עסקני הקהילה בחצר הקודש קארלין סטאלין אויסגעארבעט א ספעציעלע קליידונג מיט לאקאלע פירמעס, עס צו קענען פארקויפן פאר די חברי הקהילה און הורי המוסדות פאר א ביליגע פרייז, און צום קומענדיגן לערן יאר שנת תשפ"ז, ביז יו"ט חנוכה אלס א רעקאמענדאציע, און פון חנוכה אלס א פולשטענדיגע תקנה אין חדר, וועט עס ווערן איינגעשטעלט אין אלע תלמודי תורה דחסידי קארלין סטאלין אין ארץ ישראל, וואס רעכנט אריין ירושלים, בני ברק, ביתר, מודיעין עילית, און עיה"ק טבריה.
