חסידי סקווירא אין סטעטן איילענד האבן מיט פרייד אויפגענומען די בשורה טובה אז בברכתו ובעידודו פון כ"ק אדמו"ר מסקווירא שליט"א, וועט צום קומענדיגן לערן יאר געעפנט ווערן די טויערן פון די נייע תלמוד תורה תולדות יעקב יוסף דחסידי סקווירא אין סטעטן איילענד, מיט די נאכאנאנדע בליה און וואוקס פון די שיינע קהילה דחסידי סקווירא אין שטאט.
די סקווירא קהילה אין סטעטן איילענד האלט שוין היינט גאר נאנט צו הונדערט משפחות, און ווערט באגלייט דורכ'ן חשובן דיין הרה"ג ר' יחיאל כהן שליט"א. אצינד גייט מען ווייטער מיט די הרחבת גבולי הקדושה, מיטן עפענען די ערשטע טייל פון די מוסדות הקדושים דחסידי סקווירא אין שטאט, בברכתו ובעידודו פונעם רבי'ן.
די נייע חדר וועט געעפנט ווערן צום קומענדיגן שנת הלימודים תשפ"ז, וואו סקווירא חסידים תושבי העיר וועלן קענען מחנך זיין זייערע קינדער אויפן אויסגעטראטענעם וועג תחת דגלו והדרכתו פונעם רבי'ן שליט"א, אין די יעצטיגע טעג האט דער רבי אויפגענומען א וועד פון טעטיגע עסקנים און בעלי חינוך וואס וועלן זיך אפגעבן מיט אלע נויטיגע אנגעלעגנהייטן צום התייסדות המוסדות.
