בחצר הקודש וויזניץ אין מאנסי איז אין די יעצטיגע טעג געמאלדן געווארן די פריידיגע דעטאלן, איבער די גרויסע מסע הקודש וואס כ"ק אדמו"ר מוויזניץ שליט"א פון מאנסי נעמט אונטער קיין ארץ ישראל, אין באגלייטונג פון הונדערטער חסידים און די הונדערטער תלמידי הישיבות, ווען צום הויכפונקט וועט דער רבי פראווענען א גייסטרייכע שבת אין אתרא קדישא מירון.
דאס קומט נאכדעם וואס פארלאפענע יאר האט דער רבי שליט"א געמאלדן פאר די בחורים אין ישיבה, אז די אלע וואס וועלן זיך באפלייסן אין די לימודים און פארהערן די מסכתות וואס מען לערנט אין ישיבה, אין ראם פון די סדר הלימוד "תורתי", וועלן האבן די געלעגנהייט מיטצוקומען אויף א נסיעה מיטן רבי'ן קיין ארץ ישראל, קומענדיגן חודש אלול תשפ"ו.
אצינד איז פראקלאמירט געווארן די דעטאלן איבער די גרויסארטיגע נסיעה, וואס וועט מיטגעהאלטן ווערן דורך הונדערטער חסידים זקנים עם נערים, און די הונדערטער תלמידי הישיבות אין נייעק, זייענדיג דאס ערשטע מאל וואס דער רבי שליט"א פארט קיין ארץ ישראל מיט א גרויסע ציבור חסידים, נאך וואס דער רבי האט שוין איין מאל מיט עטליכע יאר צוריק געפראוועט א שבת אין מירון, בלויז מיט די נגידי ותומכי המוסדות.
דער רבי שליט"א וועט זיך ארויסלאזן על אם הדרך מיטוואך פרשת כי תבוא, און וועט זיך אויפהאלטן אין ארץ ישראל פאר א גאנצע וואך, ביז מיטוואך פרשת נצבים וילך, אויסער די גרויסע שבת אין אתרא קדישא מירון וועט דער רבי מתפלל זיין ביי די קברי צדיקים און מקומות הקדושים אין ארץ ישראל, און אפשטאטן באזוכן בבתי אדמורי"ם ורבנים אין אלע שטעט.
צוליב דעם וואס די תלמידי הישיבות וועלן ענדיגן דעם זוממער זמן א גאנצע וואך פריער ווי געווענליך, האט מען בלויז עטליכע טעג נאך יו"ט פסח אנגעהויבן די זמן הלימודים בין כותלי הישיבה, עטליכע טעג פריער ווי די געווענליכע טאג ראש חודש אייר, כדי צו משלים זיין די ימי הלימוד בהוראת הקודש פונעם רבי'ן שליט"א.
אין אנדערע נייעס איז פארגאנגענע וואך פארקומען א שיינע מעמד כבוד התורה במעון הנופש פונעם רבי'ן שליט"א אין די פאמאנע געגנט אין מאנסי, ווען א גרעסערע קבוצה מתלמידי ישיבה גדולה אמרי חיים וויזניץ זענען געלאדנט געווארן צום רבי'ן נאך וואס זיי האבן זיך פארהערט הונדערטער בלעטער גמרא דורכאויס די ימי בין הזמנים.
די בחורים האבן זיך געשטעלט צום פארהער אויף הונדערטער בלעטער, צווישן צוויי הונדערט און פופציג בלאט ביז צו פינף הונדערט בלאט, אין בעפארברייטונג צו די מסע הקודש קיין ארץ ישראל. ביים מעמד האט דער רבי שליט"א משמיע געווען דברות קודש, און אויך האט אויפגעטרעטן הרה"ג ר' אברהם שמואל ראנד שליט"א חתנא דבי נשיאה פון כ"ק אדמו"ר מגור שליט"א, וועלכער האט ארויסגעברענגט זיין התפעלות פון די בחורים, און שטארק ארומגערעדט איבער לימוד התורה. צום שלוס האט דער רבי שליט"א געטיילט מתנות פאר די לומדים, און ווארעם אנגעוואונטשן יעדן באזונדער מברכותיו הטהורות.
