אין די יעצטיגע טעג האבן אלפי חסידי גור איבער די גארער וועלט, און שלומי אמוני ישראל בכלל, אויפגענומען די פרייליכע און התרגשות'דיגע נייעס פון פוילן, אז די הייליגע הויף און די היסטארישע הייזער אין שטאט גורא קאלאוואריא, מקום מושבם פון די הייליגע צדיקים לבית גור, איז ענדגילטיג אריבער אל הקודש און איז פראכטפול רענאווירט געווארן כראוי וכיאות פאר אזא מקום קדוש.
די רעדע איז פון די הייליגע און היסטארישע הויף אין שטאט גורא קאלאוואריא, דארט וואו די הייליגע צדיקים די גערער רביים, דער שפת אמת זצ"ל, דער אמרי אמת זצ"ל, ובניו וצאצאיו אחריו פונעם שלשלת הקודש, האבן געוואוינט פאר לאנגע יארן און געפראוועט דארט די עבודת הקודש, זייענדיג משפיע אויף די צענדליגע טויזענטער חסידים פון נאנט און ווייט, און אריינגעלייגט קדושה וטהרה אין יעדן שטיינדל וואס האט מיטגעלעבט יענע הייליגע מאמענטן.
אין אט דעם הייליגן דירה האט דער שפת אמת זצ"ל געשריבן זיינע הייליגע ספרים און חיבורים, וואס איז פארשפרייט געווארן איבער די גאנצע וועלט. אין אט דעם מקום קדוש האבן טויזענטער אידן געדאווענט און געדינט דעם אויבערשטן, יעדן יום טוב און יעדע געלעגנהייט ווען מען איז געקומען צו פארן להסתופף בצילא דמהימנותא פון די הייליגע צדיקים.
אין צענטער פונעם הויף שטייט די אלטע בית המדרש אין שטאט גור, וואו די פריערדיגע צדיקים האבן אפגעראכטן די עבודת הקודש רבות בשנים, די בית המדרש איז פון די איינציגסטע בתי מדרשים אין די חסידישע וועלט וואס איז געבליבן שטיין דורכאויס די ביטערע קריגס צייטן ביים צווייטן וועלט מלחמה, און איז געבליבן שטיין מיט פראכט ביזן היינטיגן טאג.
ביז היינט איז ליידער פארגעקומען דארט א שרעקליכע חילול הקודש, ווען זינט די צווייטע וועלט מלחמה איז עס פארוואנדלט געווארן אין גוי'אישע געשעפטן און הייזער, און די אידן וואס האבן נאך געדענקט די לעכטיגע צייטן דארט אויפן ארט האבן געהאט גרויס צער דערפון. צדיקי בית גור לדורותיהם האבן אסאך געטון און געשתדל'ט צו קענען אויסלייזן דעם מקום קדוש, אבער ווי יעדע גוטע זאך איז עס אנגעקומען ביטער שווער ביזן היינטיגן טאג.
נאך מערערע אינטערווענצן לענגערע יארן דורך די חשובע עסקנים, שליחי הקודש פון כ"ק אדמו"ר מגור שליט"א, ובראשם הרב החסיד ר' יונתן בורנשטיין הי"ו מנהל איחוד מוסדות גור, הנגיד המפורסם ר' שלמה ווערדיגער הי"ו יו"ר אגודת ישראל בארה"ב, און הנגיד המפורסם ר' חיים פלוטשעניק הי"ו, האט מען אין א מזל'דיגע שעה נאך לענגערע השתדלות, נסיעות, און געריכטליכע סעסיעס, באוויזן צו איבערשרייבן דעם מקום קדוש מחול אל הקודש, בנדבת לבם פון די חשובע נדיבים, הנגיד המפורסם ר' שלמה ווערדיגער הי"ו, און די משפחה פון הנגיד המפורסם ר' בנציון פישהוף ע"ה, וועלכע האבן אויך גענומען אויף זיך די פאנטאסטישע הוצאות צו רענאווירן און איבערבויען דעם הייליגן הויף.
די פולע רענאוואציע ארבעט נאכן אויסלייזן דעם מקום קדוש איז געטון געווארן בהוראת הקודש פון כ"ק אדמו"ר מגור שליט"א, האבנדיג דערביי איין איינציגן ציהל צוריקצוברענגען קדושה וטהרה אין דעם הייליג פלאץ, און אז אידישע קינדער זאלן האבן די מעגליכקייט צו ווייטער דאווענען במקום שהתפללו אבותם, און זיך דערווארעמען צווישן די ווענט וואס זענען אזוי אנגעזאפט בקדושה וטהרה. דערפאר האט מען בכלל נישט אריינגעלייגט קיין איבריגע מותרות, ווי אויפצובויען דעם הויף פראכטפול און עלעגאנט צו ציען באזוכער, כדי נישט אוועקצונעמען פון די קדושת המקום וואס איז שוין מקודש הונדערטער יארן בקדושה של מעלה.
דעם מאנטאג פרשת אחרי קדושים איז א משלחת נכבדה ארויסגעפארן צום שטאט גור אין פוילן, צו פראווען דארט די מעמד חנוכת הבית און קביעת מזוזה, די משלחת איז אנטשטאנען פון די צוויי חשובע פאמיליעס לבית ווערדיגער און פישהוף, וואס האבן זיך געלאזט קאסטן שווערע מיליאנען פאר דעם מקום קדוש, ובראשם הגה"צ ר' נחמי' אלתר שליט"א בן כ"ק אדמו"ר מגור שליט"א.
ביים אנהייב פון די מעמד האט מען זיך געשטעלט ביים אריינגאנג פון די הויף, וואו עס איז אוועקגעשטעלט געווארן צוויי גרויסע געדענק שטיינער לזכרם פון די חשובע פאמיליעס, זייערע עלטערן און זיידעס וואס זענען ל"ע אומגעקומען ביים קריג ה"י. הרה"ג ר' משה חיים דאנדרוביץ שליט"א מראשי ישיבות גור האט ארומגעוויזן פאר די אנוועזנדע די גענויע אויסזען פונעם אמאליגן הויף, און דערציילט רייכע זכרונות פון יענע לעכטיגע צייטן.
דערנאך איז פארגעקומען די מעמד קביעת מזוזות, און חנוכת הבית, באותו מקום קדוש אין די הייליגע דירות וואו די צדיקים הק' האבן געפראוועט צענדליגער טויזענטער אידן און משפיע געווען אויף זיי ישועות ורפואות. דערנאך איז געווען אן איבערראשנדע מאמענט ווען מען האט אריינגעגעבן א ספר תורה אינעם הייליגן בית המדרש, אויפברענגענדיג שטיקער היסטאריע מיט גרויס התרגשות.
בראש המדברים האט דאן אויפגעטראטן הרב החסיד ר' יונתן בורנשטיין הי"ו מנהל איחוד מוסדות גור, וועלכער האט ארויסגעברענגט די געוואלדיגע מסירת נפש פון כ"ק אדמו"ר מגור שליט"א צו אויסלייזן דעם מקום קדוש פון די גוים, א פלאץ וואו הייליגע אידן האבן געפראוועט עבודת הקודש אלע יארן, דערביי האט ער זיך הארציג באדאנקט פאר די משפחות הנדיבים וואס אין זייער זכות איז מען אנגעקומען ביז אהער.
דאן האט אויפגעטרעטן דעם רבינ'ס זון הגה"צ ר' נחמיה אלתר שליט"א, וועלכער האט געברענגט צוויי פלעשער וויין וואס זיין פאטער דער רבי שליט"א האט געשיקט פאר די חשובע משפחות, זאגענדיג אין נאמען פונעם רבי'ן אז ווען ער האט ווען נאך אביסל כח וואלט ער אליינס געקומען צו פארן, און ער האט אים געמאכט א שליח צו באדאנקן פאר די חשובע נדיבים.
הגאון ר' נחמי' האט דערציילט צוויי מעשיות וואס ער האט געהערט פון זיין פאטער דער רבי שליט"א, איבער די געוואלדיגע קדושה פון דעם הייליגן הויף אין דער אלטער היים.
איין מעשה האט פאסירט ווען דער לב שמחה זצ"ל איז נאך געווען א קינד, און ער פלעגט יעדן טאג אהיימקומען פון חדר. אנצוקומען אהיים האט ער געדארפט ארויפגיין שטיגן אין א טונקעלע פלאץ, און ער האט זייער מורא געהאט דערפון. איין טאג האט זיין פאטער דער אמרי אמת זצ"ל אים אפגעווארט אונטן, און אים ארויפבאגלייט די שטיגן. דערביי האט דער אמרי אמת שטארק מחזק געווען זיין זון דער לב שמחה, זאגענדיג אז עס איז דאך "ומלאה הארץ דעה את השם" און מען דארף נישט מורא האבן. דער לב שמחה האט שפעטער דערציילט, אז זינט יענעם טאג האט ער מער אין זיין לעבן קיינמאל נישט מורא געהאט פון גארנישט.
די צווייטע מעשה האט ער דערציילט, אז דער אמרי אמת פלעגט לערנען מיט זיינע אייניקלעך יעדן טאג נאך תפילת מנחה, איין טאג איז אנגעקומען א טעלעגראם וואס האט דערציילט אז ביים לב שמחה איז געבוירן געווארן א מיידעלע. דער אמרי אמת האט זיך באלד אנגערופן "עה, איך האב אים דאך צוגעזאגט א יונגל", און טאקע מינוטן שפעטער איז אנגעקומען נאך א טעלעגראם וואס האט דערציילט אז די פריערדיגע איז געווען א טעות, און דאס ניי געבוירן קינד איז א יונגל, און דאס איז טאקע כ"ק אדמו"ר מגור שליט"א.
דערנאך האט אויפגעטראטן הנגיד המפורסם ר' שלמה ווערדיגער הי"ו, וועלכער האט דערציילט וואס ער אליינס האט מיטגעלעבט אין געריכט זאל, ווען ער איז געפארן קיין פוילן צו שתדל'ן פארן אויסלייזונג פון דעם הייליגן הויף.
ר' שלמה האט דערציילט אז עס איז געווען דארט א ריכטערין א פרוי, וואס האט נישט געקענט פארשטיין פארוואס ער קומט דא עדות זאגן, פרעגנדיג "וואס האסטו מיט דעם פלאץ? ביסט דאך א יונגער מענטש, ביסט דאך נישט אויפגעוואקסן דא אין גור.
האט ר' שלמה געענטפערט א וויכטיגע פונקט, אז אויב האט מען נישט קיין שייכות מיט היסטאריע, דאן האט מען אויך נישט מיט די עתיד, אויב וויל מען אז די קומענדיגע דורות זאלן זיין גוט, דאן דארף מען זיין פארבינדן מיטן אמאל און אנהאלטן די מסורה. די ריכטערין איז געווארן שטארק איבערגענומען און נאך א קורצע ווערטער אויסטויש האט זי אונטערגעשריבן אז די הייליגע הויף באלאנגט פאר חצר הקודש גור.
דערנאך האט אויפגעטראטן הנגיד המפורסם ר' דוב פישהוף הי"ו אין נאמען פון די גאנצע משפחה, ער האט ארויסגעברענגט אז זיין פאטער ר' בנציון ע"ה האט מיטגעהאלטן אלע גורער נסיעות, און ארויסגעברענגט די וויכטיגקייט פון האבן שייכות צו דעם הייליגן מקום.
נאכן מעמד איז דער גאנצער ציבור ארויף צום ציון הק' פון אדמור"י בית גור, וואו מען האט מתפלל געווען לישועת הכלל והפרט, שליסענדיג דעם הייליגן איבערלעבעניש מיט עמערס השפעות און אוצרות נאסטאלגיע און ווארעמקייט, זייענדיג מקושר צום רייכן אמאל.
