ווי באריכטעט מיט עטליכע וואכן צוריק איז באשטימט געווארן די גענויע פלענער פאר די היסטארישע מעמד הכנסת ספר תורה בחצר הקודש סקווירא, ווען עס וועט געפראוועט ווערן די פייערליכע חגיגה הכנסת ספר תורה פאר די ספעציעלע ספר תורה וואס איז געשריבן געווארן דורך כלל חסידי סקווירא בצוותא חדא מיטן מנהיג העדה כ"ק אדמו"ר מסקווירא שליט"א, אין ראם פון די מבצע קדשינו זיך צו מחזק זיין בעניני טעכנעלאגיע.
די גרויסע מעמד וועט פארקומען ביום כ"ח שבט אין פרשת תרומה תשפ"ה, א באזונדערע מעמד סיום כתיבת ספר תורה דינסטאג נאכט אור לכ"ח שבט, און די גרויסארטיגע מעמד מיטוואך נאכמיטאג ביום כ"ח שבט במקהלות אלפי חסידים ואנשי מעשה וואס וועלן קומען צו פארן פון נאנט און ווייט לשמוח בשמחת התורה און מיט די פערזענליכע שמחה פונעם סקווירא רבי'ן שליט"א.
נאך וואס כ"ק אדמו"ר מסקווירא שליט"א האט אויסגעדרוקט זיין פערזענליכע התרגשות און שמחה אז ער וועט זיך פרייען מיט יעדע חסיד וואס וועט אנטייל נעמען, זעהט זיך אן מאסיווע הכנות פון איבערן ים ביי די הונדערטער חסידים פון אויסלאנד וואס גרייטן זיך אונטערצונעמען דעם לאנגן נסיעה צו מיטהאלטן די היסטארישע חגיגה.
אין די יעצטיגע טעג קומט פאר א מאסיווע קאמפיין אין סקווירא שטעטל אהערצושטעלן הכנסת אורחים פאר די טויזענטער געסט פון נאנט און ווייט, דירות און שלאף צימערן ביי אלע תושבי השיכון וואס עפענען ברייט די טירן אויפצונעמען די געסט בסבר פנים יפות. ספעציעלע מכניסי אורח בויגנס זענען פארטיילט געווארן און עס ווערט געשאפן א ליסטע פון טויזענטער אכסניות ביי די איינוואוינער אין שטעטל, ווען אין די זעלבע צייט טוען פילע חסידים פון אויסלאנד זיך איינשרייבן פאר אש"ל מלא וואס ווערט צוגעשטעלט אויף א גאר ברייטע פארנעם, צו פארזיכערן אלע באדערפענישן און קלארע דעטאלן ארום דעם גרויסע חגיגה וואס וועט זיין א זמן קהילה לכל.
