הונדערטער אידן תלמידי וחסידי קארלין סטאלין אין ניו יארק גרייטן זיך צו מקבל פנים זיין בהדרת כבוד כ"ק אדמו"ר מקארלין סטאלין שליט"א, וואס איז ערווארטעט אנצוקומען די וואך אויף א געהויבענע באזוך אין ניו יארק לרגל די מעמד הנחת אבן הפינה פאר די נייע גרויסע בית המדרש דחסידי קארלין סטאלין אין בארא פארק.
דער רבי שליט"א וועט ארויספארן מארגן מיטוואך אויפדערנאכט און לאנדן בשערי העיר דאנערשטאג פארטאגס, דורכאויס די טאג דאנערשטאג וועט דער רבי אויפנעמען די חסידים מיט קוויטלעך, און דאווענען די תפילות אין ביהמ"ד דחסידי קארלין סטאלין אין בארא פארק.
שבת קודש וועט דער רבי פראווענען די תפילות און טישן אויף א גרויסע פארנעם אין די זאלן פון "דע פאלאס", וואו עס איז ערווארטעט א גרויסע ציבור חסידים פון אלע שטעט. מוצאי שבת וועט פארקומען די פייערליכע מעמד הנחת אבן הפינה אויפן שטח וואו עס גייט שוין אן די העפטיגע בוי ארבעט אויפצובויען דעם נייעם גרויסן ביהמ"ד לשם ולתפארת, אויף די זעכצנטע עוועניו ביים ווינקל פון די זיבן און פערציגסטע סטריט.
