תלמידי וחסידי וויען אין בארא פארק האלטן מיט א ערנסטע אנטוויקלונג אינערהאלב די קהילה, ווען אין די יעצטיגע טעג איז באשטעטיגט געווארן אז די ביהמ"ד זכרון יהודה דחסידי וויען אין בארא פארק, וועט זיך ענדגילטיג אריינציען אינעם נאסטאלגישן בנין פון בית הכנסת עדת יראים וויען.
די ביהמ"ד זכרון יהודה איז געגרינדעט געווארן א לאנגע צייט צוריק, אלס א ווארעמע תל תלפיות פאר די אינגעלייט חברי הקהילה דחסידי וויען, זיך צו פאראייניגן בשבת אחים ברידערלעך אינאיינעם אין א אחדות'דיגן אטמאספער, ביז היינט איז די ביהמ"ד געווען איינקוואטירט אין א געדונגענע לאקאל, און די נויט פאר א גרעסערע לאקאל האט זיך שטארק אנגעזעהן שוין א לענגערע צייט.
אצינד איז באשטימט געווארן אז די גרויסע בנין בית הכנסת דקהל עדת יראים וויען אויף די פופציגסטע סטריט, וואס דינט שוין לאנגע יארן אלס אכסניא של תורה ותפילה פאר די צענטראלער וויענער קהילה אין בארא פארק, וועט אצינד צוטיילט ווערן אין צוויי אפטיילונגען, א באזונדערע אפטיילונג פאר די צענטראלע קהילה עדת יראים, און א באזונדערע אפטיילונג פאר די אינגעלייט אינערהאלב קהל זכרון יהודה.
צו דעם צוועק איז געווארן אונטערגענומען א ערנסטע רענאוואציע פראיעקט צו איבערבויען די געביידע מיט גרויס פראכט ווי עס פאסט פאר א פארנומענער בית מקדש מעט, און אצינד גרייט מען זיך צום פריידיגן מאמענט, ווען די מתפללים פון ביהמ"ד זכרון יהודה וועלן זיך קענען אריינציען בעז"ה אין זייער נייע אייגענע אכסניא, דעם קומענדיגן שבת קודש פרשת בהעלותך הבעל"ט.
