תושבי בארא פארק באוויינען די פטירה פון הרב החסיד ר' חיים צבי אלבוים ע"ה, וועלכער איז ליידער נפטר געווארן היינט מאנטאג, עטליכע חדשים נאך וואס ער איז קריטיש פארוואונדעט געווארן אין א קאר עקסידענט רח"ל.
די עקסידענט האט פאסירט מאנטאג פרשת ויגש זאת חנוכה, אויף די זעכצנטע עוועניו ביים ווינקל פון די זעקס און פערציגסטע סטריט אין בארא פארק, ווען ר' חיים צבי איז געווארן אראפגעקלאפט דורך א פארבייפארנדע קאר און איז קריטיש פארוואונדעט געווארן. זינט דאן איז ער געלעגן על ערש דוי אין שפיטאל אין א שווערן צושטאנד, און היינט מאנטאג אינדערפרי האט ער אויסגעהויכט זיין נשמה ליוצרה, בשיבה טובה אין עלטער פון ניין און אכציג יאר.
דער חשובער נפטר איז געווען מזקני החסידים בחצר הקודש באבוב 45, וואו ער איז געווען פון די לעגענדארע תומכים און זקני ופני העדה. ער איז געווען א גרויסער תלמיד חכם און האט עוסק געווען בתורה לאנגע שעות יעדן טאג. די לוויה וועט פארקומען היינט מאנטאג דריי דרייסיג נאכמיטאג ביי שומרי הדת אין בארא פארק.
שנשמע ונתבשר בשורות טובות.
