שווערע טויזענטער אידן האבן יעצט נאכמיטאג אין ארץ ישראל שווארץ געמאכט די גאסן אין ירושלים עיר הקודש, צו באגלייטן דעם זקן האדמורי"ם כ"ק מרן אדמו"ר מביאלא זצוק"ל למנוחת עולמים, בלויז געציילטע שעה נאך וואס דער רבי איז נתבקש געווארן לישיבה של מעלה, בשיבה טובה אין עלטער פון 89 יאר.
די לוויה האט זיך אנגעהויבן ארום האלב נאך איינס מיטאג, בהיכל ביהמ"ד הגדול ביאלא אויף רחוב יעקובזון, בעפאר דעם האט מען אפגעראכטן די טהרה אינעם בית הלוויות שמגר, און צוליב די קורצע צייט פון ערב שבת קודש האט מען נישט מאריך געווען מיט הספדים.
די לוויה האט זיך אנגעהויבן מיט אמירת תהלים, פארגעזאגט דורכ'ן גבאי בית המדרש הרב החסיד ר' נתן דוד זונענשיין הי"ו, דערנאך האבן די טויזענטער חסידים געריסן קריעה כדין תלמיד על רבו, ווען שרעקליכע בכיות ווערט געהערט אינעם גאנצן היכל, ווי די חסידים געזעגענען זיך שווער פון דעם געטרייען מנהיג.
דערנאך האט אויפגעטרעטן מיט קורצע ווערטער הרב הגאון ר' מאיר בראנד שליט"א מרבני הקהילה, חבר ביד"ץ דקהל מחזיקי הדת בעלזא, ער האט געבעטן מחילה בשם די קהילה און אלע חסידים, און דאן פארגעליינט א טייל פון די צוואה, וואס דער רבי האט געהייסן פארליינען ביי די מסע הלוויה. אין די צוואה בעט דער רבי מחילה פון די חסידים, און בשעת די חסידים האבן געהערט די הייליגע צוואה האט זיך געהערט יאמערליכע בכיות פון אלע זייטן.
דאן האט מען אויסגערופן אז דער רבי זצוק"ל האט קלאר געשריבן אין די צוואה, וואס זיין רצון איז איבער אויפנעמען א נייע מנהיג, אבער די תוכן הדברים וועט מען הערשט פארליינען פארן ציבור ככלות ימי השבעה.
נאכן זאגן קדיש האט דער ציבור אנגעהויבן ארויסגיין פון ביהמ"ד, מען האט באגלייט די מיטה צופיס כמנהג ירושלים, דורך די גאסן פון יעקובזון, חנה, עלי הכהן, צפניה, יחזקאל, כיכר השבת, מאה שערים, ביז צום הר הזיתים, וואו דער רבי איז געקומען למנוחת עולמים נעבן זיין גרויסן פאטער הרה"ק בעל חלקת יהושע מביאלא זי"ע.
צווישן די פילצאליגע גדולי הדור וואס האבן זיך באטייליגט ביי די לוויה, האבן זיך אנגעזעהן כ"ק האדמורי"ם מגור, תולדות אהרן, קארלין סטאלין, באיאן, בוהוש, משכנות הרועים, מאקאווא, סערט ויזניץ, סאדיגורא, זוועהיל, קאפיטשניץ, קוזמיר, טאלנא אשדוד, אוזרוב, קאליב, סקולען ירושלים, סטראפקוב, סטריקוב, סוכוטשוב, תורת חכם, אונגוואר, לוצק, סאדיגורא ירושלים, הגאון הגדול רבי ברוך בער פאווארסקי שליט"א ראש ישיבת פאנאוויטש, גאב"ד קרית צאנז ירושלים, ראש ישיבת טשעבין, אב"ד מאקאווא אשדוד, דומ"ץ בעלזא לאנדאן א שוואגער מיטן רבי'ן זצ"ל, און נאך אדמורי"ם רבנים וראשי ישיבות.
