נעכטן אויפדערנאכט ביים גרויסארטיגן יארצייט טיש בחצר הקודש צאנז, האט כ"ק אדמו"ר מצאנז שליט"א אדרעסירט די פרישע גזירת הגיוס וואס נעמט ארום טויזענטער אידן תושבי ארץ הקודש הנתונים במצוקה, דער רבי האט ערווענט אז אין די יעצטיגע שעת השמד איז די ריכטיגע זאך זיך בכלל נישט צו שטעלן אין מיליטער, און אויספאלגן די הוראת הקודש פון מרנן ורבנן גדולי הדור ראשי הישיבות שליט"א וועלכע האבן אזוי באפוילן.
די גרויסארטיגע יארצייט טיש לרגל די יומא דהילולא קדישא פון הרה"ק מצאנז קלויזענבורג זי"ע בעל שפע חיים, איז פארגעקומען היי יאר בליל ההילולא ט' תמוז, אנדערש ווי געווענליך וואס דער רבי פראוועט דעם טיש אין די שפעטע פארנאכטס שעה'ן בעצם יומא דהילולא, וויבאלד מארגן דינסטאג קומט פאר א גרויסע רעבישע חתונה בחצר הקודש צאנז.
דער רבי האט ארומגערעדט א לענגערע צייט איבער די שווערע צייטן וואס גייט אריבער אויף ארץ ישראל'דיגע איינוואוינער, אנגעהויבן מיט די מלחמה צייטן זינט יום טוב שמחת תורה, און אצינד מיט די שרעקליכע גזירת הגיוס וואס הויערט אויף אונזערע קעפ. דער רבי האט געזאגט מיט ווייטאג דאס וואס געזעצגעבער דא אין לאנד זענען ארויס אין מלחמה קעגן די לומדי תורה, וואס באדייט אז זיי שטאמען זיכער פון די ערב רב פון וועם מען דארף שטיין ווייט אין יעדע צייט.
דער רבי האט געזאגט אז די גדולי התורה מרנן ורבנן ראשי הישיבות שליט"א, האבן שוין געזאגט זייער דעת תורה אז אצינד ווען עס איז א שעת השמד טאר מען זיך אויף קיין שום פאל נישט שטעלן אין מיליטער אפילו אויף צו באקומען א פטור, וויבאלד יעצט איז א מצב וואס פעלט זיך אויס מסירת נפש ממש.
אויך האט דער רבי מייסד געווען א נייע קרן ארויסצוהעלפן די ישיבות און די כוללים וואס פארלירן אצינד א ריזן שטיצע פון די רעגירונג, און מחייב געווען יעדן חסיד צוועלף הונדערט שקל פאר דעם הייליגן צוועק, מי לה' אלי!
