אין א געמיינזאמע בריוו אונטערגעשריבן דורך גדולי האדמורי"ם וראשי ישיבות בארץ הקודש, טוען די גדולי הדור אונטערשטרייכן די איסור גמור זיך צו שטעלן אין לשכת הגיוס אפילו אינעם ערשטן שריט, שטייענדיג יעצט נאך וואס די מדינת ישראל מיליטער האט אנגעהויבן ארויסשיקן בריוו צו די תלמידי הישיבות.
ווי באקאנט איז די דאזיגע טעמע אויפגעפרישט געווארן אין די לעצטערע וואכן, נאך וואס די גזירת גיוס בני הישיבות איז ווידער אויפן ארענע, ווען די ציוניסטישע מיליטער פרובירט אריינצושלעפן די ישיבה בחורים אין מיליטער, אוועקנעמענדיג א פטור פון לומדי תורה ווי עס איז געווען ביז היינט. גדולי הדור מנהיגי ישראל ראשי הישיבות און אדמורי"ם מפורסמים האבן שוין געלאזט הערן זייער קלארע דעת תורה איבער דעם ענין, און אצינד איז ערשינען א פאראייניגטע מכתב קודש אונטערגעשריבן דורך א צאל גדולי הדור, וואו זיי שרייבן קלאר און דייטליך אז מען טאר זיך נישט שטעלן בכלל אין לשכת הגיוס, אפילו עס זעהט נישט אויס אזוי שלעכט.
די גדולי הדור שרייבן אינעם בריוו:
היות עס איז ארויסגעשיקט געווארן בריוו דורך די מיליטער צו פארלאנגען די בחורים און אינגעלייט זיך צו שטעלן אין מיליטער ה"י, ווילן מיר קלארשטעלן דאס וואס די פריערדיגע צדיקים און גדולי ישראל האבן שוין ארויסגעברענגט אין די פארגאנגענהייט, אז מען טאר זיך נישט שטעלן אין מיליטער אויף קיין שום פאל, אויך אויב זיי שטעלן צו ספעציעלע אפטיילונגען פאר חרדישע אידן, וויבאלד מען האט זיך שוין איבערצייגט אז זיי מיינען עס נישט ערנסט. עס איז קלאר אז מען קען דארט נישט בלייבן א ערליכע איד און היטן תורה ומצוות, אפילו ווען זיי זאגן צו אז מען וועט יא קענען, וויבאלד זיי האבן נישט קיין נאמנות על פי תורה, און עס איז נישטא קיין איין גדול בישראל וואס קריגט זיך דערויף.
דעריבער ווילן מיר קלארשטעלן די דעת תורה פון די גדולי הדור, אז אלע בחורים און אינגעלייט וואס באקומען די גיוס פארלאנג, זאלן זיך "נישט" שטעלן אין מיליטער בכלל, און דער אויבערשטער זאל אפהיטן אלע אידישע קינדער מען זאל קענען ביישטיין די שווערע נסיונות, און בלייבן ערליכע אידן נאמנים לה' ולתורתו.
די בריוו איז אונטערגעשריבן דורך כ"ק האדמורי"ם מטשערנאביל, ראחמיסטריווקא, אלכסנדר, סטריקוב, שבט הלוי, הגה"צ ראש ישיבת טשעבין, הגה"צ ר' הערשל ראבינאוויטש ראש ישיבת באיאן, הגה"צ ר' נפתלי נוסבוים ראש ישיבת חיי משה, הגה"צ ר' ישראל ברזובסקי ראש ישיבת סלונים, צוויי בעלזא דיינים הגה"צ ר' שמאי קהת הכהן גראס און הגה"צ ר' חיים דוד שובאקס שליט"א, הגה"צ ר' שמואל אליעזר שטערן שליט"א גאב"ד מערב בני ברק, און הגה"צ ר' שמחה ראבינאוויטש שליט"א בעל מח"ס פסקי תשובות.
