תלמידי ומעריצי קהילה קדושה אמונת ישראל האבן אויפגענומען מיט פרייד די מעלדונג, אז הגה"צ אבד"ק אמונת ישראל שליט"א בנו חביבו וממשיך דרכו פון הגה"צ רבי משה וואלפסאן זצ"ל אבד"ק אמונת ישראל, וועט ארויספארן אויף א געהויבענע נסיעה קיין ארץ ישראל לקראת יום טוב פורים הבא עלינו לטובה, און פראווענען דעם יו"ט בקרתא דשופריא.
דער רב שליט"א וועט פארן אין באגלייטונג פון פילע תלמידים און חסידים, וואס וועלן אויסנוצן די געלעגנהייט צו מיטהאלטן דעם יו"ט בצל הקודש פונעם רב שליט"א, נאכדערצו היי יאר ווען עס געפאלט פורים המשולש, און עס נעמט אריין דריי געהויבענע טעג אין א פרייליכע שטימונג.
דער משגיח הגה"צ אבד"ק אמונת ישראל זצ"ל האט עטליכע מאל אונטערגענומען אזא סארט נסיעה, צו פראווענען דעם יו"ט פורים בקרב עדת צאן מרעיתו אין ירושלים עיה"ק, געווען איז עס אין יאר תשנ"ד, תשס"א, תשס"ה, און תשס"ח, און אצינד ווערט ווייטער נמשך דעם הייליגן מנהג, ווען בנו חביבו וועט ארויספארן קיין ירושלים לקראת יו"ט פורים הממשמשים ובאים.
דינסטאג פרשת כי תשא עטליכע טעג פאר יו"ט פורים, וועט דער רב שליט"א מופיע זיין בשערי ארץ הקודש, און פארוויילן אין ארץ ישראל איבער א וואך צייט ביז מיטוואך פרשת ויקהל. פרייטאג די ערשטע טאג פון פורים המשולש וועלן די תפילות און קריאת המגילה געפראוועט ווערן אין ביהמ"ד אמונת ישראל אין ירושלים, אין די בנין פון ישיבת שערי יושר אויף רחוב אבן האזל.
די תפילות און טישן דורכאויס שבת, און אזוי אויך די דריטע טאג פורים זונטאג, וועלן געפראוועט ווערן אין בנין ישיבת פורת יוסף אויף רחוב מלכי ישראל, דארט וואו דער משגיח זצ"ל האט געפראוועט יו"ט פורים המשולש איינער פון די יארן.
