חסידי וויזניץ בארץ הקודש גרייטן זיך צו מקבל פנים זיין כ"ק אדמו"ר מוויזניץ שליט"א פון לאנדאן, וועלכער איז ערווארטעט אנצוקומען בשערי ארץ הקודש דעם קומענדיגן מיטוואך הבא עלינו לטובה, אויף א נסיעה פון עטליכע טעג בקרב חסידיו, און אויפצוטרייבן סכומים הגונים לטובת מוסדותיו הקדושים המתנוססים לתפארה בעיר הבירה לאנדאן.
דער רבי שליט"א וועט זיך ארויסלאזן אין וועג מיטוואך תולדות, אויפדערנאכט וועט דער רבי אנקומען קיין ירושלים עיה"ק, וואו עס וועט זיין די אכסניא ביי הרב החסיד ר' יחיאל מיכל סורקיס הי"ו מחשובי חסידי סקווירא אויף רחוב תכלת מרדכי אין קרית בעלזא ירושלים. דאנערשטאג אינדערפרי וועט דער רבי אנקומען אויף תפילת שחרית בבית מדרשו פונעם ברודער כ"ק אדמו"ר מוויזניץ שליט"א אין בית שמש, און שפעטער ביינאכט וועט פארקומען א מעמד קבלת פנים לכבודו פונעם רבי'ן אין ביהמ"ד הגדול דקהל תורת חיים וויזניץ אויף רחוב אדוניהו הכהן אין ירושלים.
שבת קודש וועט דער רבי פראווענען אויף א גרויסע פארנעם בעיר הקודש ירושלים, און מוצאי שבת וועט פארקומען א מעמד תפילה ברוב עם ביים שריד בית מקדשינו דער כותל המערבי להיפקד בדבר ישועה ורחמים.
