שאקירנדע באריכטן קומען אריין פון די שטאט דובאי אין די פאראייניגטע אראבישע עמיראטן, אז א ארטיגע חב"ד רב איז ל"ע פארכאפט געווארן דורך בייזוויליגע טעראריסטן, און עס איז נישט קלאר זיין יעצטיגע צושטאנד.
דער שליח חב"ד הרב צבי קאגאן וועלכער דינט אלס געהילף פאר די הויפט חב"ד רב אין די אראבישע עמיראטן, איז צום לעצטן מאל געזעהן געווארן פארלאפענעם מיטוואך, אין לויף פון דאנערשטאג האט ער פארפאסט א רייע באשטימטע זיצונגען, ברענגענדיג זארג ביי זיינע נאנטע צו ער איז נישט פארכאפט געווארן ה"י.
ליידער האט זיך עס אויסגעשטעלט צו זיין וואר, ווען די לאקאלע זיכערהייט אגענטורן האבן פעסטגעשטעלט אז ר' צבי איז פארכאפט געווארן דורך דריי פארשוינען פון אוזבעקיסטאן, וואס מען ווייסט איז אז די קאר פון ר' צבי איז געפונען געווארן אין א געגנט ארום אנדערטהאלבן שעה פון זיין היימשטאט אבו דאבי, די פאליציי האט עס געטראפן פארלאזט, און אוועקגעפירט די קאר פאר אויספארשונגען.
די דריי פארשוינען וועלכע האבן אים פארכאפט זענען אנטלאפן קיין טערקיי, און עס איז נישט קלאר וואו ר' צבי געפונט זיך, און צו ער געפונט זיך נאך בכלל ביים לעבן, מערערע נייעס קוועלער און רעגירונג אגענטורן גלייבן אז ער איז דערמארדעט געווארן רח"ל, און מען ווארט נאך אויף קלארע באשטעטיגונגען דערצו.
ר' צבי האט אין די פארגאנגענהייט געדינט אין די מדינת ישראל מיליטער, און די מדינת ישראל רעגירונג וועלכער גלייבט אז איראן האט דאס אונטערגעשטעלט, האט ארויסגעשיקט עטליכע פארשער צו פארן קיין דובאי ארויסצוהעלפן מיט די זוכעריי און אויספארשונג, און אזוי ארום לייגן דרוק אויף די באאמטע צו דערגיין די ווארהייט ווי אמשנעלסטן.
