א שוידערליכע טראגעדיע האט פאסירט די נאכט אויף די ניו דזשערזי טורנפייק אין ניו דזשערזי, ווען פיר היימישע בחורים זענען ליידער טראגיש אומגעקומען רח"ל ווען א אנגעטרונקענע דרייווער איז געפארן אויף די פארקערטע ליניע און אריינגעקראכט אין זייער קאר.
די עקסידענט האט פאסירט בעפאר איינס אזייגער ביינאכט, אויף די ניו דזשערזי טורנפייק ביים עק פון ניו דזשערזי, הארט בעפאר די דעלאווער מעמאריעל בריק אריבערצופארן קיין דעלאווער, די בחורים זענען ארויסגעפארן פון לעיקוואד מוצאי שבת קודש, אונטערוועגנס אויף א בין הזמנים אויספלוג קיין טענעסי, און האבן ליידער זיך אפגעשטעלט אויף אייביג אנהייב פון די לאנגע רייזע.
א איין און פערציג יעריגער מאן מיט א פיקאפ טרעקל איז געפארן אויף די פארקערטע ליניע, און אריינגעקראכט אין די אידישע קאר וואס האט געפירט פיר בחורים, אין רעזולטאט פון די שווערע עקסידענט האט א גרויסע טרעקטאר טרעילער פון הינטער די אידישע קאר צודרוקט די קאר, און אלע פיר אידישע פאסאדזשירן זענען ליידער נפטר געווארן אויפן פלאץ פון די שרעקליכע וואונדן.
אידישע עסקנים זענען אנגעקומען אויפן סצענע צו פארזיכערן כבוד המת, און פאר לאנגע שעות האט מען געארבעט אינאיינעם מיט די פאליציי און אויספארשער אויפן סצענע, ביז מען האט אידענטיפיצירט די פיר בחורים און זיי ארויסגעגעבן לקבורה, דער דרייווער פון די קאר איז געווען הב' יעקב קילבערג ע"ה פון לעיקוואד, ניינצן יאר אלט, נאך א בחור איז געווען הב' אהרן לעבאוויטש ע"ה אכצן יאר אלט פון לעיקוואד, הב' שלמה כהן ע"ה אכצן יאר אלט פון לעיקוואד, און הב' חיים גראסמאן ע"ה פון סאוט פאולסבורג, אכצן יאר אלט.
די פיר לוויות קומען פאר דורכאויס די היינטיגע נאכמיטאג שעות, ביים לעיקוואד טשאפל און די הויך שולע דערנעבן, און זיי ווערן געברענגט לקבורה אויפן ארטיגן בית החיים.
