אין די צייט וואס אלופי אלפי ישראל האבן מקבל געווען עול מלכות שמים ביים היסטארישן עצרת המיליאן ברחובות העיר ירושלים, האט ליידער פאסירט א שרעקליכע טראגעדיע, ווען א בחור'ל איז אראפגעפאלן פון א גאר הויכע שטאק ביים העכסטן געביידע אין ירושלים, און איז ליידער נפטר געווארן פון די גאר שווערע וואונדן ה"י.
ליידער האט מען געזעהן אומגעשמאקע בילדער וואו יונגע בחורים קריכן אויף סכנה'דיגע פלעצער, אויף הויכע שטאקן אין קאנסטרוקציע זאנעס, ליידער האט עס געקאסט א גאר טייערע פרייז, ווען א בחור איז אראפגעפאלן פון א הויכע שטאק, פון א פערציג שטאקעדיגע בנין וואס ווערט פאררעכנט אלס די העכסטע געביידע אין ירושלים, און האלט נאך טיף אינמיטן קאנסטרוקציע.
פילע עמערדזשענסי אגענטורן זענען באלד צוגעלאפן און געארבעט צו ראטעווען דעם בחור, אבער ליידער איז קורצליך דערויף באשטעטיגט געווארן אז ער איז נפטר געווארן לחיי העולם הבא, צום טיפן שאק און שוידער פון די הונדערטער טויזענטער פארזאמלטע אויפן ארט.
די עסקנים האבן באלד אלארמירט די אלע וואס שטייען אויף הויכע און מסוכנ'דיגע ערטער, אז זיי זאלן נישט פרובירן אראפצוגיין, נאר אויסווארטן ביז די רעטונג לייט קומען זיי אפנעמען, צו פארמיידן פרישע פעלער צווישן די מאסן.
