נאך די נעכטיגע באריכטן פון די פאראייניגטע אראבישע עמיראטן איבער א חב"ד שליח פון דובאי וועלכער איז פארכאפט געווארן דורך בייזוויליגע טעראריסטן ה"י, איז זיין קערפער געפונען געווארן היינט פארטאגס אין א געגנט אין דובאי, ליידער נישט בין החיים רח"ל.
דער חב"ד שליח הרב צבי קאגאן ז"ל, וועלכער איז געווען אכט און צוואנציג יאר אלט, האט אנגעפירט א אידישע סופערמארקעט אין דובאי און צוגעשטעלט כשר'ע עסן פאר אידישע קינדער אין די געגנט, ער איז געפארן צו א זיצונג אין א שטאט נישט ווייט פון זיין וואוינארט אין אבו דאבי, אונטערוועגנס איז ער פארכאפט געווארן דורך א גרופע טעראריסטן וועלכע האבן אים געוואלט אריבערפירן קיין איראן, און נאך וואס ער האט געשטעלט א העפטיגע ווידערשטאנד און זיך געשלאגן מיט זיינע פארכאפער, האבן זיי אים קאלטבלוטיג ערמארדעט אויפן פלאץ ה"י.
די טעראריסטן זענען אנטלאפן פון לאנד און א העפטיגע אויספארשונג איז אקטיוו, א לענגערע צייט האבן די לאקאלע זיכערהייט באאמטע געזוכט נאך דעם פארלוירענעם איד, און היינט פארטאגס האט מען געטראפן א פארלאזטע טויטע קערפער, וואס איז נישט לאנג דערויף באשטעטיגט געווארן אז דאס איז דער פארלוירענער איד, וואס איז רח"ל אומגעברענגט געווארן דורך טעראריסטן השם ינקום דמו.
דערווייל איז נאכנישט ארויסגעקומען קיין קלארע באריכטן איבער וואס און וויאזוי עס האט פאסירט, אזוי אויך איז נאכנישט ערשינען קיין פונקטליכע פרטים איבער די לוויה, שטייענדיג אצינד געציילטע טעג בעפאר די יערליכע כינוס השלוחים ווען טויזענטער שלוחי חב"ד נעמען זיך צוזאם אויף די יערליכע פארברענג אין קראון הייטס.
