מיט א קארגע וואך פארבליבן גרייטן זיך פילע חסידים מיטצולעבן א געהויבענע רעבישע חתונה בחצרות וויזניץ און פרימישלאן, וואס וועט אין א ערשטמאליגע פארנעם געפראוועט ווערן אין די גיגאנטישע זאלן "די סיטי" פעסטונג אין מישור אדומים, וואס געפונט זיך נעבן ירושלים עיה"ק, און ווערט גענוצט פאר גרעסערע מאורעות בחצרות הקודש.
די חתן איז א אייניקל פון כ"ק אדמו"ר מוויזניץ שליט"א, א זון פון הגה"צ ר' דוד ראזענבוים שליט"א, בנו הגדול פון כ"ק אדמו"ר מפרימישלאן שליט"א. די כלה איז א טאכטער פון הרה"ג ר' יעקב יצחק קליין שליט"א דיין אין די וויזניצע קהילה, און אייניקל פון הגאון החסיד ר' אשר יונה וויינבערגער זצ"ל מוותיקי חסידי וויזניץ אינעם פריערדיגן דור.
דעם זונטאג איז דער זיידע כ"ק אדמו"ר מוויזניץ שליט"א אנגעקומען אויף א באזוך ביים זיידן כ"ק אדמו"ר מפרימישלאן שליט"א, און אים פערזענליך איינגעלאדנט צום שמחת החתונה. היינט איז ערשינען א פערזענליכע הזמנה פון כ"ק אדמו"ר מפרימישלאן שליט"א, וואו ער לאדנט עדת חסידיו וצאן מרעיתו זיך צו קומען מיטפרייען ביי די גרויסע שמחה.
אין בעפארברייטונג צו די ימי השמחה איז דער זיידע כ"ק אדמו"ר מוויזניץ שליט"א ארויסגעפארן נעכטן מאנטאג קיין אתרא קדישא מירון, אויף א תפילת רבים אינאיינעם מיט די חסידים, דעם שבת קודש פרשת תרומה שבת שקלים וועט געפראוועט ווערן די שמחת האויפרוף, סיי בצל הקודש פונעם זיידן כ"ק אדמו"ר מוויזניץ שליט"א, און סיי בצל הקודש פונעם זיידן כ"ק אדמו"ר מפרימישלאן שליט"א.
מאנטאג מיטאג וועט פארקומען די סעודת עניים אין ביהמ"ד הגדול וויזניץ, און מיטוואך פרשת תצוה ה' אדר די גרויסע חתונה אין "די סיטי" ווי דערמאנט. שבת שבע ברכות וועט געפראוועט ווערן בחצר הקודש וויזניץ, נאכגעפאלגט מיט די צענטראלע שמחת השבע ברכות מאנטאג אויפדערנאכט.
