מארגן זונטאג פרשת חיי שרה וועט זיך אנהייבן א פרישע נסיעה פון די גדולי הדור בארה"ק לטובת קרן עולם התורה, ווען מרנן ורבנן ראשי הישיבות אדירי התורה וועלן ווידער נעמען דעם וואנדער שטעקן און זיך ארויסלאזן לערי הגולה, אויפצוטרייבן פרישע מיליאנען צו קענען פינאנצירן דעם עולם התורה בארה"ק, אין ליכט פון די שרעקליכע גזירת הגיוס וואס האט דראסטיש געשניטן די פינאנציעלע שטאנד אויפצוהאלטן די ישיבות און כוללים בארץ הקודש.
די יעצטיגע רייזע נעמט אריין עטליכע גרויסע און באקאנטע שטעט לענגאויס אייראפע, וואו די גדולי הדור וועלן חונן זיין את פני העיר, מרנן ורבנן ראשי ישיבת סלאבאדקע, הגאון הגדול רבי דוב לאנדא שליט"א, און הגאון הגדול רבי משה הלל הירש שליט"א. דער משגיח הגאון הגדול רבי דן סגל שליט"א, הגאון הגדול רבי שמעון גלאי שליט"א, הגאון הגדול רבי יצחק אזרחי שליט"א ראש ישיבת מיר, הגאון הגדול רבי דוד כהן שליט"א ראש ישיבת חברון, הגאון הגדול רבי יעקב הלל שליט"א ראש ישיבת אהבת שלום, און הגאון הגדול רבי חיים מרדכי אוזבאנד שליט"א ראש ישיבת עטרת שלמה.
די ערשטע סטאנציע וועט זיין אין די גאלדערסגרין געגנט אין לאנדאן, וואו די גדולי הדור זענען ערווארטעט אנצוקומען זונטאג חיי שרה, און באשיינען א רייע מסיבות און מעמדים לטובת קרן עולם התורה. א גרויסע מעמד קבלת פנים וועט פארקומען אין די פריע נאכמיטאג שעה'ן ברחובה של עיר, אויף די צענטראלע פרינצעס פארק עוועניו גאס ביי ברידזש לעין, מיט די באטייליגונג פון טויזענטער אידן תושבי העיר און נאך.
דינסטאג חיי שרה וועלן די גדולי הדור פארזעצן די רייזע קיין פאריז פראנקרייך, וואו עס וועט פארקומען א גרויסע מעמד קבלת פנים לכבודם דורך די טויזענטער תושבי העיר. דערנאך וועלן די גדולי הדור זיך איינטיילן און ארויספארן אין נאך פארשידענע שטעט, קיין אנטווערפן בעלגיע און קיין ציריך שווייץ.
