אלפי חסידי חב"ד באוויינען די שווערע אבידה, מיט די פטירה פון הרב החסיד ר' משה קאטלארסקי ז"ל, דער לאנגיעריגער בריח התיכון פון אלע שלוחי חב"ד אלוועלטליך, און א היסטארישע פיגור אין חב"ד מיט מערערע תפקידים און אויפטואונגען דורכאויס די יארן.
ר' משה איז געווען פיר און זיבעציג יאר אלט, שליסענדיג א רייכע קאפיטל פון תורה וחסידות, יארן לאנג פלעגט ער ארומפארן איבער אלע עקן וועלט צו מזכה זיין אידישע קינדער, מייסד זיין בתי חב"ד איבעראל, און העלפן אוועקשטעלן די מעכטיגע אימפעריע וואס זעהט זיך אן נאנט און ווייט.
אזוי אויך איז ער געווען דער וויצע טשערמאן פון די באקאנטע כינוס השלוחים העולמי, זייענדיג יערליך אויפן פאדיום צו באגריסן די העכער פינף טויזענט שלוחי חב"ד, און א לעגענדארער פאנדרעיזער וואס האט אויפגעטריבן שווערע געלטער נאכאנאנד צו דעקן די אסטראנאמישע קאסטן פון די קירוב פראיעקט.
די לוויה וועט פארקומען מארגן מיטוואך צוועלף אזייגער מיטאג ביי שומרי הדת אין בארא פארק, דערנאך ארום איינס אזייגער ביים חב"ד הויפטקוואטיר אויף 770 איסטערן פארקוועי אין קרוין הייטס, דערנאך וועט ער קומען לקבורה סמוך ונראה צום ציון הק' פון הרה"ק מליובאוויטש זי"ע אין קווינס.
