נעכטן זונטאג אויפדערנאכט איז נפטר געווארן בשיבה טובה הרבנית הישישה מרת מאטל פיגא תאומים ע"ה, אלמנת הגה"צ ר' יעקב תאומים זצ"ל אבד"ק אלטשטאדט אין בארא פארק, וועלכע האט זוכה געווען צו א זעלטענע שיבה טובה גרייכענדיג איבער די הונדערט יאר, און לאזט איבער א הערליכע דור פון רבנים ומורי הוראה.
די רעבעצין ע"ה איז געווען די יונגסטע טאכטער פון כ"ק אדמו"ר מבאסטאן הרה"ק רבי פנחס דוד הורוויץ זצ"ל, וועלכער האט זוכה געווען אוועקצושטעלן א שטארקע אידישע אנוועזנהייט אין שטאט באסטאן, און מקרב געווען אידישע קינדער לאביהם שבשמים.
אין אירע יונגע יארן איז זי אויפגעוואקסן אין שטאט באסטאן, און מיטגעהאלטן דעם פייערדיגן מסירת נפש'דיגע הנהגה פון איר גרויסן טאטן, שפעטער האבן זיי זיך געצויגן קיין ניו יארק וואו זי האט חתונה געהאט און אויפגעשטעלט א שיינעם שטוב, מיט איר חשובער מאן הגה"צ ר' יעקב תאומים זצ"ל אבד"ק אלטשטאדט אין בארא פארק.
אלע יארן איז זי געווען באקאנט מיט אירע מעשי צדקה וחסד, און געשטאנען צו די רעכטע האנט פון איר חשובער מאן אנצופירן די בית המדרש אויף די צוויי און פופציגסטע סטריט אין בארא פארק.
די רעבעצין ע"ה לאזט איבער א הערליכע דור, חשובע איידימער רבנים ומורי הוראה, און פילע אייניקלעך תלמידי חכמים מופלגים. איר זון הרה"ג ר' דוד תאומים זצ"ל איז נפטר געווארן בחייה, און איבערגעלאזט א שיינע משפחה בליעה"ר, צווישן אירע איידימער איז געווען הרה"ג ר' זלמן לייב גרובער זצ"ל רב דקהל זכרון יואל יאס אין לעיקוואד, און נאך חשובע רבנים מנהיגי קהילות קדושות בישראל.
יעצט פארמיטאג קומט פאר די לוויה אין ביהמ"ד אלטשטאדט אויף די צוויי און פופציגסטע סטריט אין בארא פארק, וואו עס זענען פארזאמלט א גרויסע ציבור אפצוגעבן דעם כבוד האחרון.
